Ka Loompyrdi Iongpiah Upper Primary School, Jowai mynta ka sngi 26 tarik u Rympang 2025, kala pynhap pyrda ïa ka jingrakhe Silver Jubilee ne ka jingdap 25 snem ka jingshakri ha ka liang ka jingnang jingstad, ha ka jingïalang kaba la long ha madan Mynkoi Pyrdi Iaw Iongpiah, ha kaba u MLA ka thaiñ ma Wailadmiki Shylla ula long u kongsan.
La ïoh ïa ka jingpynsngew ïa ka history jong ka jingïaidlynti jong ka skul na u ma Hercules Toi uba dei u Founder Member ka LIUPS, la wan ban ïadonlang ha kane ka sngi da ka kong A.P. Syiem Jt. Director of School Education, Headmistress kong Neetu Shullai, u ma R.L. Bimee Suwer, Waheh Shnong ka Loompyrdi Iongpiah Jowai, ki nongshong shnong ki nonghikai skul bad ki khynnah skul.
Ka Headmistress jong ka skul ka kong Neetu Shullai kala ong ïa kane ka skul la seng ha ka 26 tarik February, 2000 bad ha ka jingïaid lynti ka skul kala kynduh shibun ki jingeh, hynrei da ka jingtrei shitom ki Committee Skul bad ki kmie ki kpa jong ki khynnah skul la lah ban pynlong ïa ki prokram bapher bapher ha kaba ki khynnah skul kila ïoh lad ban ïashim bynta na ka bynta ban pynpaw pyrthei ïa ki sap ki phong.
Ka skul kala ïoh shibun ki khusnam kum ka best slogan, ka jingïakop drodur, ka jongthoh essay nalor kiwei kiwei de. Ha ka jingïaid lynti la 25 snem ka skul kala nangkiew katba dangmih ki snem khamtam ha ka jingrung klas jong ki khynnah (Enrolment). Kumba long mynta ka skul ka don 337 ngut ki khynnah skul bad ka jingeh ka long ban pynkiew kyrdan ïa ka namar ka jingbym don jaka shuh bad ka lad mynta ka long satang ban pynkynriah jaka noh kaba don ha ka shnong Chyrmang.
Katba u kongsan ma Wailadmiki Shylla ha ka jingkren ula ai khublei ïa ki nongseng jong kane ka skul kaba la bteng haduh mynta ban ai jingshakri ha ka liang ka jingnang jingstad ïa ki khynnah skul, da kaba u ong ka kamram mynta ka long ban pynjanai shuh shuh ïa ka skul da kaba kyntiew kyrdan sha ka Secondary School.
Ula pynsngew ïa ka jingangnud ki paidbah ka Rilum Jaiñtia ban pynïoh sa kawei ka Govt College hapoh Rilum Jaiñtia, ïa kaba ka sorkar kala mang ban buh shen sa kawei ka Govt College ha East Jaiñtia.
Kumba long mynta u ong ki don haduh 15,000 tylli ki skul hapoh ka jylla, kumta ka sorkar kala pynbna ba ïa ki skul kiba leh bha kin sa ïoh ïa ka khusnam, katba ïa kito ki skul kiba duna ka sorkar kan sa pyrkhat bha ban leh ïa kaba donkam.
Kum u MLA u khot ban don ka jingïatreilang khnang ban kyntiew shalor ïa ka pule puthi hapoh ka shnong, da kaba u kitbok ba kane ka jingrakhe Silver Jubilee kan wanrah ïa ka jingkiew shuh shuh ha ka liang ka jingstad jingtip.
Haba pynkut ïa kane ka sngi la ïoh ïaka jingsam khusnam da ki Momentoes sha baroh kiba don bynta bad ka skul, ka jingpyllait ïa ka kot sah jingkynmaw (Souvenir) ka skul, ka jingrwai ïa ka School Anthem, ka jingot ïa u Cake jong ka jingdap 25 snem ka School bad ka jingkhang pyrda ïa u Mascot.
