Ka Seng Rangbah Katholik Mihmyntdu, mynta ka sngi 31-12-2022 ka la pynkut noh ia ka prokram ialehkai phutbol kaba la tip kum ka Katholik Invitation Football Tournament 2022, ia kaba la sdang naduh ka 3 tarik u Nohprah 2022. Ia kane ka prokram la pynhap pyrda da u Kongsan u ma Awhai Andrew Shullai, MDC Jowai Central Constituency ha ka jingiadonlang u Symbud Kongsan u ma Rana Lakiang, u Fr. Ferdinand Dkhar, Diocesan Administrator ka Jowai Diocese bad kiwei kiwei de ki riew pawkhmat.
Ha kane ka sngi la don ka jingialehkai phainal hapdeng ka Lumpyrtuh Primary Unit pyrshah ia ka 7Pillars Iawmusiang-Khimmusniang CMC ha kaba ka Lumpyrtuh Primary Unit ka la pynliem ia ka 7Pillars da 1-0 bad rah ruh ia ka nam lahduh da ka pisa ryngkat bad ka Trophy.
Shwa ban sdang ka jingialehkai, ladon ka prokram ba lyngkot ia kaba la pyniaid da u ma. Livingstone Rymbai ha ka jingiadonglang u Sport Secretary u ma Ricallus Pasi, u Chairman ka Sport committee bad kiwei de ki dkhot ka Seng.
Haba ai jingkren ha kane ka sngi, u Fr. Ferdinand Dkhar u la kyntu bad aimynsiem ia nongiashimbynta ha kane ka tournament ba kin don ka mynsiem iaieid, jingiatylli bad jingiaburom markyrlliang. Shuh shuh u la ai ka jingiaroh ia ka Seng Rangbah Katholik Mihmyntdu kaba la pyniaid ia kane ka tournament kum shibynta ban pyniatylli ia ki para Rangbah jong ka Balang bad ruh jong ka Imlang sahlang.
U Ma Andrew Shullai u la ong ba kum ki Rangbah ngi donkam ban don ka Balance lane jingphikir ha baroh ki liang la ha ka rukom im, ka jingiadei bad ka imlang sahlang bad ruh ha ka jingkoit jingkhiah halade shimet. U la ai khublei kyrpang ruh ia ka Seng Rangbah Katholik Mihmyntdu kaba la shim ia kane ka jingkitkhlieh ban wanrah ka jingiajan bad jingiatylli iwei ia iwei lyngba kane ka Tournament. U la pan ruh ka jingkyrshang bad jingiatreilang na baroh khnang ban wanrah ia ka roi ka par bad ka bha ka miat ha baroh ki liang.
La pynphuh pynphieng shuh shuh ia kane ka sngi da ka jingrwai na ka Samla Besynta Phawa (Jaintia Got Talent Finalist Season-4 bad ruh ka jingshad ba itynnat na u Samla Defender Pasi.