Mynta ka sngi 21.11.2021 ka SENG RANGBAH KATHOLIK MIHMYNTDU, kala pynkut noh ia ka Silver Jubilee Football Tournament da ka jingialehkai phutbol phainal hapdeng ka Dong Lumpyrtuh FC Pyrshah ia ka Dong Pohskur FC. La plie ia kane ka phutbol phainal da u Chief guest u Ma. Remigius Susngi u ba la ai ruh ka jingkren kitbok kitrwiang ia ki player. Ha ba kren sha ki paidbah, u ma Remiguis Susngi u la ai khublei kyrpang ia ka Seng Rangbah Katholik Mihmyntdu, kaba la pynlong ia kane ka tournament kaba pyniatylli bad ai mynsiem ia ki Rangbah jong ka Balang bad ka shnong hi baroh kawei. U la ai ruh ka jing khublei kitbok kitrwiang ia ki dkhot jong ka Seng ha ka jingrakhe jong ki ia u ne u Snem Jubilee.
Shuwa ban sdang ia ka phainal jong kine ki artylli ki team, la sdang shuwa da ka friendly match hapdeng ka Seng Rangbah Mihmyntdu pyrshah ia ka Seng Rangbah Katholik Jowai Parish ha kaba ka Seng Rangbah Mihmyntdu ka la jop ia ka Seng Rangbah Jowai Parish da 1-0 kol.
Haba sdang pat ka ka Phainal hapdeng ka Dong Lumpyrtuh pyrshah ia ka Dong Pohskur, ka jingialehkai ka long shisha ka ba itynnat bad iakhaid ha kaba baroh artylli ki team ki long kiba khlaiñ bad pyni shisha ia ka sap ialehkai jong ki. Ha baroh artylli ki kylla jong ka jingialehkai ym don ba lah ban thep kol ha kaba ia ka jingialehkai la rai noh da ka Penalty shootout, ha kaba ka Lumpyrtuh FC ka la rah ia ka nam lahduh.
La sakhi lang ia kane ka jingialehkai da bun ki nongkyrshan jong baroh artylli ki dong bad kumjuh ruh ki nongshnong jong ka Shnong Mihmyntdu.
Ha ka prokram ba lyngkot la pyniaid da u ma Carmel Suchiang, bad la ioh ruh ka ka jingkren pdiang burom da u President ka Seng u ma Lamshwa Chyrmang bad la pynwai da u Chairman ka Balang Katholik u ma Fedric Synnah. La sam ia ki trophy sha ki nongjop da u Chief Guest ryngkat bad ka jingsynran lang ar ngut ki Refree u ma Khymolang Phawa bad u ma Kroland Nongrum.
