Ka Seiñraij Higher Secondary School, Jowai mynta ka sngi Balang 11 tarik u Nohprah, 2024 kala pynhap pyrda ïaka jingrakhe ‘Diamond Jubilee Celebration’ ne ka jingdap 60 snem ka jingïaid lynti ban shakri jingnang jingstad ïa ki khynnah skul ka thaiñ naduh u snem 1964.
Ha kane ka sngi pynkut la wan ban donlang naduh u Symbud Myntri Rangbah ka jylla u ma Sniawbhalang Dhar kum u kongsan, ma Wailadmiki Shylla MLA uba dei ruh u Chairman ka MUDA kum u symbud kongsan, u President ka Seiñraij Jowai ma Hercules Toi, u Dolloi ka Elaka Jowai ma Puramon Kynjing, ki riew rangbah ka thaiñ, ki nonghikai bad ki khynnah skul.
U ma Sniawbhalang Dhar haka jingkren ula ong “khlem ka thong jong ki nongïalam ba hakhmat eh jong ka skul, yn ym lah satia ban poi haduh kane ka sngi ba khraw”, ha ka juh ka por ula kular ban pynïoh jingïarap nyngkong ïa kaba donkam hakhmat eh jong ka skul lyngba ka jingïatreilang jong u MLA ka thaiñ bad ka SMC.
Ula pynsngew ruh ïa ki project bapher bapher ki ban la pyntrei hapoh ka Jowai naduh ka Iawmusiang kaba la sahteng la 20 snem, ki surok, ka Mini Secretariat, ka ïew Mall ha ka jaka ka building jong ka DC ophis, ka madan ïalehkai Stadium ha Ladthadlaboh bad ki jingtei ha ka kam jngohkai phyrthei hapoh Jaiñtia Hills nalor kiwei de kiba la sdang ban pyntreikam.
Hapoh jong kine ki 18 bnai jong ka sorkar MDA-2 la wanrah shibun ki kam pynroi hapoh ka District Jaiñtia Hills kala kot sha ka 2 hajar klur duna, ym tang ha ka District hynrei haka jylla hi baroh kawei da kaba wanrah ïa ka New City ha Mawdiangdiang ka ban ïa ryngkat kyrdan bad kiwei de ki jylla, ka Assemble ba thymmai kaba yn sdang noh ban shong ïalang ha kane ka Autumn Session ban wan nalor kiwei kiwei de.
Ka Principal jong ka skul ka kong Wompher Laloo kala pynsngew ïaka jingïaid lynti jong ka skul naduh basdang jong ka snem 1964 haka ïing skul Assam type bad kala kiew kyrdan na uwei u snem sha u wei pat haduh ba ka skul kala ïoh ïa ka building ba pura kumba la long mynta.
Ha ka juh ka la buh ka jingkyntu ïa u Symbud Myntri halor ka jingdonkam ka Higher Secondary kaba la sdang naduh 2009 hynrei haduh mynta ka dang duna ban ïoh jingïarap na ka sorkar, ha kane ka sngi kala aiti ruh ïa ka Memorandum ha u Symbud Rangbah.
U ma H. Toi uab dei ruh u President ka Seiñraij Jowai ha ka jingkren ula ong lyngba kane ka skul kala pynmih naduh ki Doctor, ki nongtrei kam sorkar bapher bapher bad ki rangïalehkai, ula pyntip ruh bunsien ïa kane ka skul la ïarap pisa lyngba ka bei Seiñ Raij Jowai.
Shuh shuh ula pynsngew ïaki jingdonkam jong ka skul kiba kynthup sa ka Science bad Commerce kaba kot 4 klu tyngkar da kaba ïaid lang katkum ka ‘New Education Policy’ bad mynta ka skul ka don ar tylli ki Vocational Training.
Ula ai jingïaroh ïa ka sorkar lyngba u Myntri Rangbah uba la kular ban tei ïa ka Parking Lot kaba 8 klur tyngka ha Ïawmusiang mar pyrshah ka DC ophis bad ïa kane la dep ruh ban pynkhreh ïa ka DPR.
Hashwa kane la ïoh ka jingkren pdiang na ka kong Finland Passah, La pynphuh pynphieng shuh shuh ïa kane ka sngi da ki jingshad, jingrwai bala shim bynta da ki khynnah skul bad ki nonghikai.
La pynkup burom ruh ïa u ma S. Ram Paswet uba dei u nongseng Founder Member & Headmaster M.E School, ka jingot ïa u Cake dap 60 snem, ka jingpynkup burom ïa ki nonghikai barim ka skul, katba ïa ki kyntien ai khublei la ïoh da u ma Mariyoo Rymbai Headmaster UPS / Secretary Diamond jubilee.
