Ka tnad pyniaid Election jong ka Jylla mynta ka sngi kala phah ia ka kynhun shipai jong ki Central Armed Police Forces (CAPF) haduh 3 company na ka bynta ban ai ka jingpahara bad ban pynjai jai ia ka jinglong jingman ha kitei ki thaiñ hadien bala mih ka jingiakynad bad ka jingiashoh iadat jong ki nongkyrshan jong ki ar tylli ki party jong ka TMC bad ka NPP.
Nalor ki kynhun shipai ka tnad Election la phah ruh ia ki SDO (Civil), ki SDPO bad ki BDO ban jurip halor kane ka jingjia bad ban wanrah ia ka jingshong suk shong shngaiñ ha ka shnong Charbatapara kaba hap hapoh ka 46-Phurbari Assembly Constituency.
Kat kum ka jingpyllait khubor u District Election Officer, West Garo Hills ula ong ba kane ka jingjia kala jia hynnin ka miet ha ka por kumba 10:45 PM. Ha kane ka jingjia la don 9 ngut kiba la mynsaw bad la rah ia ki sha Phulbari CHC hynrei hadien ka jingioh jingsumar la pyllait pat ia ki. Hynrei ia u Nojrul Hoque uba kham mynsaw jur na ki bynta ka khmat la pynkynriah noh sha ki jaka sumar ba kham shalor.
La ong ruh ba mynta ka sngi, katkum ka ejahar bala aid a u Nozim Hussain na ka shnong Charbatapara ula kynnoh ba kala don ka jingiaid proseshon jong ka kynhun NPP ba la ialam da u Habibur Zaman bad haba kane ka kynhun kala poi ha khmat ïing jong u katto katne ki briew kila kawang man sha ka ïing jong u. Ha kane ka jingjia kumba 4 ngut ki briew kila mynsaw.
La iathuh ba ka daw jong kane ka jingjia ka long ba katba u Habibur Zaman bad ki nongkyrshan ka NPP ki dang iaid lynti lyngba ka shnong Charbatapara, katto katne ki nongkyrshan jong ka TMC kila tied ia ka kali Scorpio jong ki bad kane kala wanrah ia kane ka jingiakynad.
Haduh mynta iakane ka kynrum kynram la lah ba teh lakam iathuh ki bor pyniaid District.