Ïa ka Bouncers Association of Meghalaya (BAM) East Jaiñtia Hills District la ïoh ban pynkha ïaka hynnin ka sngi 14 tarik u Risaw ha Khliehriat West Community Halls EJHD.
Ha kane ka sngi la ïadonlang u kongsan ma Serious Dkhar, symbud kongsan kong Jai jai Wanka Lamare, u President ka BAM-JH ma Yoosar Kynjing, u Dolloi ka Elaka Jowai ma Puramon Kynjing ki nongkitkam BAM West bad East Jaiñtia Hills, ki nongïalam shnong nalor kiwei de.
La jied ïa ki nongkitkam jong kane ka BAM East Jaiñtia Hills District ba kynthup ïa u President incharge u Jasmin Dkhar, u Binson Rymbai General Secretary, u Grilintus Malang Asst. General Secretary, u Pynhun Sutong Publicity Secretary bad u Silias Rymbai Asst. Publicity Secretary.
Katba na ka liang ka Women’s Wing la jied ïaka Jenefer Lyngdoh kum ka President incharge EJHD, ka Kpeinlang Ryngkhlem General Secretary, ka Sabina Shylla Asst. General Secretary, ka Maya Langstang Publicity Secretary bad ka Nidawan Shylla Asst. Publicity Secretary.
Kiba ai jingkren ha kane ka sngi kila ai ka jingkitbok kitrwiang ïa kane ka tnad treikam jong ka Bouncers Association of Meghalaya (BAM) East Jaiñtia Hills District ba kin trei shitom ïa ka kam bala pashet ha ki, namar kane ka kynhun ka long kawei na ki lad ban ai jingïada na ka bynta ban wanrah ïa ka shong suk shnong shngaiñ bad kaba la ïalam lynti kumjuh ïa ki khun samla ban lait na ki kam sniew ba bun jait.
La pynphuh pynphieng shuh shuh ïa kane ka sngi da ki jingshad bad ki jingrwai na ki samla jong katei ka thaiñ bad la ot ruh ïa u cake kum ka dak ba la pynkha ïa ka BAM-EJHD.
