Ka Meghalaya People United Front (MPUF), mynta ka sngi ka la ioh ban pynkha ia ka tnat ki longkmie kaba la tip kum ka MPUF Women Wing, EJHD, ha Khliehriat West Community Hall, East Jaintia Hills District, ha ka jingiadonlang u ma Dapoiwanmi Laloo President ka Meghalaya People United Front (MPUF) seng kmie, u President ka MPUF EJHD ma Kyrshan Blah bad kiwei de.
U ma Dapoiwanmi Laloo haba ai jingkren sha ki longkmie kiba pyniasoh sha ka seng hynne ka sngi, u la kyntu ia ki ba kin long ki kynthei kiba shlur bad kiba len lade na ka bynta ban ia da ia ka ri bad ka jait bynriew bad kumno ruh ban ai ka jingkyrshan ne iarap ia ki para doh para snam kiba shem lanot ne ha kino kino ki bynta. Ula ong ruh ba ka seng ka la ioh ban iarap bad kyrshan shibun ki longiing kiba kynduh jingeh ha kiba bun rukom.
Mynta ka sngi ha shwa ban pynskhem ia ki longkmie ne ka MPUF- Women Wings East Jaintia Hills District, kiba don kumba shi spah ngut ryngkat bad kiwei de ki dkhot shynrang thymmai, la don ka jingialang kaba la pyniaid da u samla Aimon Syad General Secretary ka seng, bad la iohi ruh ia ki jingkren na u President ka MPUF EJHD ma Kyrshan Blah, uba la ong bun ki kup shiliang ki sem shiliang hapoh kane ka District kiba ym shym la ioh satia ka jingiarap na ka liang ki nongmihkhmat kumjuh ruh na ka sorkar, katba na ka liang ka seng haba ka tip ne iohi ia kum kine ki longiing ka ju kloi ban ai jingiarap katba kot ka bor jong ka seng, ia ka jingai jingrap ka seng ka la juh ioh ban iarap ia ki baduk na ka por sha ka por.
Ki nongkit kam ka MPUF- Women Wings East Jaintia Hills District ki long President kong Pretty Shylla, Vice President kong S. Ryngkhlem, General Secretary kong B. Lamare, Assistant Secretary kong H. Kynjin bad kiwei de ki dkhot ka EC.
Ha kane ka sngi la ioh ruh ia ki jingkren na u samla Johny Phawa President San Shnong, ma Kynmaw Phawa General Secretary Wapung, samla K. Siangshai Secretary MPUF EJHD bad kiwei de. Ia ka jingpyntian smai bad ai ki kyntien sneng kyntien kraw ia ki dkhot ka Women Wing la ioh na u ma Dapoiwanmi Laloo President ka Meghalaya People United Front (MPUF).
