Ka jingialehkai 2nd North East Olympic Game 2022 kaba la pdiang ban pynlong da ka jylla Meghalaya mynta ka kynti kala poi noh sha kaba kut mynta ka sngi hapdeng ka jingsahkynmaw ia baroh ki nongialehkai, ki nongpyniaid bad kiba iadon bynta lang baroh.
Ka Jylla Manipur kala dei ka jylla kaba la ioh ia ka nam lahduh ne ka Overall Champions, ha kaba kala lah ban iada ia ka burom kaba kala ju ioh ha ka NEOG 2018. Mynta ka kynti ka Manipur kala ioh ban khur haduh 88 tylli ki takma Ksiar, 75 ki Rupa bad 77 ki Rnong, katba ka jylla Assam kaba wan ba-ar kala ioh khur 79 ki takma Ksiar, 61 ki Rupa bad 63 ki Rnong. Ka Arunachar Pradesh kala wan ha ka kyrdan kaba lai bad ioh khur 39 ki takma Ksiar, 36 ki Rupa bad 37 ki Rnong.
Ka Jylla Meghalaya kaba dei ka nongpdiang ia kane ka jingialehkai ka pynpaw ia ka jingtreishitom ha kaba kala kiew kyrdan na kaba hynriew ha u snem 2018 bad poi mynta ha ka kyrdan kaba saw. Saw snem mynshwa ka Meghalaya kala ioh khur tang 3 tylli ki takma Ksiar, hynrei mynta kala lah ban ioh haduh 36 tylli ki takma Ksiar, 35 tylli ki takma Rupa bad 78 tylli ki takma Rnong.
Ki riew pawkhmat kiba la wan ban sakhi lang ia kane ka jingpynkut ia kane ka jingialehkai ki kynthup ia u Chief Patron jong ka jingialehkai uba dei ruh u Chief Ministerka jylla u Conrad K Sangma uba dei u kongsan jong kane ka prokram, la iadon lang ruh u Myntri ka tnat Sports and Youth Affairsm bah Banteidor Lyngdoh, bah Renikton Lyngdoh Tongkhar, u Abdus Saleh, u bah Kimfa Sidney Marbaniang, u Chief Secretary ka jylla u bah Donald P Wahlang, u Commissioner and Secretary of Sports and Youth Affairs Dr Vijay Kumar D, Director General of Meghalaya Police u Dr Lajja Ram Bishnoi bad u Secretary General jong ka North East Olympic Association u bah John F Kharshiing.
U Chief Minister ula ioh ban aiti ia ka trophy lahduh –Overall Champions sha ka Manipur, nangta sha ka Runners-up ka Assam bad sha ka Third Place kaba dei ka jylla Arunachal Pradesh. Ia ka Lama jong ka NEOG la aiti da u bah John F Kharshiing sha u Chef de Mission jong ka Nagaland u Neilyalie Angami, namar kawei pat ka lympung jong kane ka jingialehkai kan sa long ha ka Jylla Nagaland ha u 2026.
Ha kane ka sngi pynkut kala don ka jinglehkmen da ki prokram bapher bapher kum ki rwai ki pud bad kiwei de.