Ka Inter State Youth Exchange Programme ba 5 sngi ba la pynlong da ka Nehru Yuva Kendra Shillong ryngkat ki nongiashim bynta na Mizoram kaba la sdang naduh ka 16 tarik mynta u bnai ka la poi sha kaba kut mynta ka sngi, ha ka jingialang kaba la pynlong ha Youth Hostel Shillong.
Ha kine ki 5 sngi kila don shibun ki Prokram kum ka Yoga, ka jingpyni kylliang ia ki riti dustur lyngba ka jingleit peit leit jngoh ia ki jaka mynbarim ba don khana bad kiwei kiwei.
Mynta ka sngi kaba dei ka sngi ba pynkut ia kane ka prokram la wan ban pynhap pyrda da u Sibhi Chakravarthy uba dei u Director ka Community and Rural Development ka sorkar Jylla kum u kongsan.
Haba kren ha kane ka sngi ula ai ka jingiaroh ia ka NYKS kaba la lah ban pynlong ia kum kane ka prokram, kaba ai jingmyntoi shibun ia ki khun samla ban tip shaphang ki riti ki dustur bad ka jingim jong ki nongshong shnong.
U Chakravarthy u la ban jur halor ka jinglong shitylli wat hapdeng ka jingiapher na kawei ka jait bynriew sha kawei pat hapoh ka ri India. U la pynshlur ia ki samla ban long kiba wad ia ki jingtip bad ban sngewthuh ia ka jinglong ba iasyriem jong ki jylla bapher bapher hapoh ka ri.
Kane ka prokram ka la long shisha kaba seisoh kaba la wanrah ia ka jingialong kawei hapdeng ki khun samla ka ri na ki tynrai bapher bapher, ka jingiaburom markylliang bad ka jingtip ia ki riti dustur kaba la wanrah ia ka mynsiem jingiatylli hapoh ka ri.