Ka District Hub for Empowerment of Women, hapoh ka jingkhmih jong ka Social Welfare Department, West Jaintia Hills ha ryngkat ka jingïatreilang bad ka Happy Red Rooster, MMA Shillong, kila pynlong ia ka prokram ai jinghikai “Five Days Self Defence Training for girls” ha St. Mary Mazzarello Girl’s Higher Secondary School Jowai.
Ia kane ka prokram la pynlong kum shi bynta na ka Annual Calendar jong ka skhim “Beti Bachao Beti Padhao” kaba thmu ban ai ka jingïada hapdeng ki kynthei da kaba pynkupbor ïa ki ryngkat ka jingnang ban ïada ïalade.
Kila don baroh 88 ngut ki khynnah kynthei kiba la wan ban ïashim bynta ha ka jingai jinghikai kaba 5 sngi kaba la sdang naduh ka 9 tarik haduh ka 13 tarik mynta u bnai. Kine ki khynnah kynthei kila ïoh ïa ki jinghikai na ki nonghikai ba kyrpang jong ka Happy Red Rooster, Shillong ba kynthup ïa u I. Kharmawphlang, Head Coach, u Rueben Lulam, Coach, ka R. Sunn, ka S. Lamurong bad u D. Rymbai kiba dei ki nongïakhun.
Haba ai jingkren ha ka sngi pynkut ïa kane ka prokram u bah I. Kharmawphlang, Head Coach ka Happy Red Rooster, MMA Shillong ula batai ïa ka jingdonkam ban nang kumno ban ïada ïalade kum ki kynthei ban ïada ïalade ha kino kino ki khep ba ïakynduh ïa ki jingma. U kyntu ïa ki khynnah ban long kiba koit ba khiah ha ka met ka phad bad ha ka jingmut jingpyrkhat bad khot ruh ïa ki ban shim bynta bha ha ki kam sport bad ki kam kilan met na ka bynta ka jingmyntoi jong ki.
Kiwei de kiba ïadon lang ha kane ka sngi ki kynthup ïa ka Principal jong ka St.Mary Mazzarello Higher Secondary School ka Sr. T.Phawa, ka District Social Welfare Officer kong Y. Najiar, District Mission Coordinator DHEW bah FGN Rynga, Gender Specialist DHEW kong Y. Kyndait. La am ruh ïa ki Certificates sha baroh ki nongïashim bynta.
