Jop u Lamet Phawa bad u Karlin Phawa ha ka Double
Ka West Jaiñtia District Sports Association (WJDSA) Jowai, kum ka dak ban pynneh pynsah ïa ki riti dustur ki longshwa manshwa, mynta ka sngi kala pynkut ïa ka jingïakop Siat Khnam kaba la tip kum ka ‘Open to All Traditional Archery Competition’ ba la pynlong ha madan Kiang Nangbah Stadium Dongmihsngi Jowai.
Ïa kane ka jingïasiat khnam la pynïaid da ka (WJDSA) shi bynta na ka jingrakhe Jubilee Ksiar ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
U President ka Kiang Nangbah Ïasiat Khnam Memorial Society u ma Pearlet Toi ula wan ban pynhap pyrda ïa kane ka jingïakop Siat Khnam da kum u kongsan, ha ryngkat ka jingdonlang u Working President ka WJHDA ma E.M.H. Passah, u Hony. General Secretary ma Lammat-oo Laloo nalor kiwei de ki dkhot ba hakhmat jong ka Association.
Na ka liang u kongsan haba ai jingkren uba la ai ka jingïaroh ïa ka WJDSA kaba la shim ïa kane ka bynta, da kaba ong ba mynshwa ïa u khnam bad ka ryntieh la pyndonkam ha kaba ïalehthma ban ïada na ki nongshun naduh ki por jong u Woh Kiang Nangbah bad la juh pyndonkam ruh haba leit siat mrad.
Khang ban pynneh pynsah ïa kane u ai nuksa ba ka Kiang Nangbah Iasiat Khnam Memorial Society ha kine ki por mynta kala pynkylla ïa ka sha kawei na ka jingïalehkai kata ka jingïasiat tim kaba pynlong manla ka sngi kum shi bynta ban pynneh pynsah ïa dustur bad ha ka juh ka por kan ïarap ruh ha ka kamai kajih.
Ïa ki khusnam sha ki nongjop ha ryngkat ka trophy bad ka song pisa ula sam da u kongsan, ha ka kyrdan Double ha ryngkat ka pisa 20 hajar la jop da u Lamet Phawa bad u Karlin Phawa, ba wan ba ar ryngkat ka pisa 10 hajar la ïoh da u Saiñmiki Suwer bad u Sajemiki Laloo, katba ha ka Single la wan nyngkong da u Lamet Phawa ryngkat ka pisa 10 hajar bad wan ba ar da u Embok Phawa lem bad ka pisa 5 hajar tyngka.
