Ka jingiakynduh ba 5 (San) sngi jong ki samla halor ka phang “Border Area Youth Exchange Programme” (BAYEP) kaba la khot pynlong da ka Nehru Yuva Kendra Shillong kala poi sha kaba kut ha ka 9 tarik mynta u bnai ha nongbah Shillong.
Ha kane ka prokram ki samla na ka jylla Assam, Bihar, Jharkhand, Sikkim bad na West Bengal kila ia wan poi naduh ka 5 tarik mynta u bnai ban iashim bynta ha kane ka prokram ba san sngi lynter.
Kila don shibun ki prokram bad ki jingialehkai kilan met kum ka Yoga bad kiwei, kala don ka jingiaphylliew jingmut bad ka ka jingleit jngoh ia ki shnong ki ba kongsan kiba don ha ki thaiñ khappud. Kala don ka jingleit jngoh ia ka shnong Dawki kaba don mar syndah bad ka ri Bangladesh, ka shnong Mawlynnong kaba dei ka shnong ka khuid tam hapoh Asia, ka jingleit jngoh ia ka Don Bosco Centre na ka bynta ban ioh jingtip ia ki riti bad ki dustur jong ki jait bynriew jong kane ka thaiñ.
Ha ka sngi ba pynkut ia kane ka prokram ka kong Anita Kharpor, IAS kaba dei ka Deputy Commissioner jong ka Eastern West Khasi Hills District, Mairang kala long ka kongsan.
Haba ai jingkren hakane ka sngi kala pynpaw ka jingiaroh ia ka Nehru Yuva Kendra Sangathan kaba la ai ia ki khun samla ia kane ka rynsan ban ioh jingtip kham bun shaphang ka jingriew spah jong ka riti, ka dustur jong ki jait bynriew jong kane ka thaiñ kaba kdew ia ka jinglong kyrpang jong ka ri India.
Khadduh kala pynpaw ia ka jingkyrmen ba ka jingwan iashim bynta jong kine ki samla kiba na bar ka jylla kila ioh shibun ki jingmyntoi, ha kaba kala pynshlur ia ki ban bteng ia ka jingpynsaphriang ia kaei kaba kila ioh sha kiwei pat ki para samla. Ka da khmih lynti ba ki samla ba mynta kin sa long ki nongialam bad ki nongwanrah jingkylla ia ka lawei jong ka ri hi baroh kawei.
