Ka Jaiñtia Student Union (JSU) kawei na ki sengbhalang kaba paw bha hapoh ka Ri-Lum Jaiñtia kaba peit ym tang ia ka bha ka miat jong ki khynnah skul hynrei ia im lang ka sah lang ruh, mynta ka sngi Saitjaiñ kala ïoh ban pynkut ïa ka jinglehkmen dap 50 snem ne ka Julilee ksiar jong ka ha ka jingïalang ba la pynlong ha madan Jrisaleiñ Jowai.
Ïa ka jingïalang la pynïaid da u President ba rim jong ka seng u ma Rikut Parien, ha ryngkat ka jingïadonlang u kongsan ma Comet Star Kyndiah uba dei u nongïalam barim ka seng bad u Legal Adviser JSU, u Ex President JSU-CB ma Rudolf E. Laloo, ki nongïalam ka seng naduh u President samla Jersom Shylla, u General Secretary samla Treibor R. Suchen, kiwei de ki nongïalam sengbhalang na Khasi bad Jaiñtia, ki riew rangbah ka thaiñ lem bad ki paidbah.
Ha kane ka juh ka sngi la ïoh ban pyllait paidbah ïa ka kot “U Kiang Nangbah” ba la thoh ha ka ktien phareng da u Dr. H.H. Mohrmen, la don ruh ka jingplie ïa ka sur jingrwai Jubilee Ksiar ka seng bad ka jingot ruh ïa u cake dap 50 snem ka seng da u kongsan.
Baroh ki nongkren ha kane ka sngi ki pynpaw ka jingïaroh ïa ka seng JSU kaba la jam sha une u marmer ba 50 snem naduh ka snem 1972 ba la seng ia ka, wat hapdeng ki raieh raidam kane ka seng ka dang ïai tyllun na kawei ka snem sha kawei pat na ka bynta ban shakri ïa ka Ri bad ka Jaitbynriew hi baroh kawei.
Kum ka seng kaba la rim bha kala leh shibun ki kam ba bha ha ka imlang ka sahlang bad kuhjuh ha ka jylla hi baroh kawei, la ïathuh ba ka dei ka seng kaba shimkhia bah ïa ka jingeh jong ki paidbah ka Ri-Lum Jaiñtia naduh ka Pule ka Puthi, ka koit ka khiah, ka kamai kajih nalor kiwei de.
Kane ka prokram kala long kaba ishong kun hapdeng ka jingiphuh iphieng ha kaba la don ruh ka jingrwai kyrpang, ki jingshad tynrai nalor kiwei de, katba ha ka por janmiet la don ka jingsam khusnam sha ki nongïalehkai Sports bad ki sur jingtem ba bun jait.
