Ka Khasi Jaiñtia Presbyterian (KJP) Assembly mynta ka sngi U Blei kala pynkut ïa ka taïew lehkmen ba kyrpang jong ki longkmie Khristan ne ka ‘Women‘s Week & Women’s Sunday-2025’, ïa kaba la buh beit buh ryntih ban rakhe manla u snem.
Ïa kane ka taïew la rakhe ha kylleng ki bynta jong ka Ri Khasi Jaiñtia bad kumjuh sha ki jaka rithor kiba hap hapoh ka jingpeit jong ka KJP Assembly. Kane ka taïew ki longkmie la sdang naduh ka sngi nyngkong jong ka 14 tarik u Naitung bad pynkut mynta ka sngi U Blei 20 tarik u Naitung, 2025 halor ka phang kaba ong “Ka jingthew ka rynïeng ka jingdap U Khrist” (Ephesos- 4:13).
Ha Balang Presbyterian Khimusniang, Jowai lyngba ka Jingïaseng Kynthei la rakhe ïa kane ka taïew ba kyrpang da kaba pynlong shibun ki prokram naduh ka sngi nyngkong (Monday) kiba kynthup ïaka Jingïaseng Paidbah ban plie ïa ka Theme, ka jingkren halor ka Sub-Theme, ka Elocution, ka Mono Act Play, ka Jingïaseng Ïalap nalor kiwei de.
Mynta ka sngi U Blei haka Jingïaseng Paidbah haka por 1:00 baje nohphai sngi ïaka khubor na ka ktien u Blei la sam da ka kong Percia Phawa, kaba la kren halor ka phang jong ka jingrakhe kaba ong “Ka jingthew ka rynïeng ka jingdap U Khrist” (Ephesos- 4:13).
Ka kong Percia Phawa kala kyntu ïa ki para bangeit ban long kiba ïaineh haka jingngeit, kala kren shaphang ka kyntien ‘jingthew’ kaba dei ban long beit kaba hok, kaba shisha, kaba biang bad kaba tikna khlem da theh shiliang. Halor ka kyntien ‘ryngïeng’ pat ka ong ba ka don ar jingmut kawei kaba ïadei bad ka long ryngïeng haka longbriew manbriew, sa kawei ka thew ïa ka jingstad, ka jingshemphang bad ka jingtip ba maïan Blei.
Shuh shuh kala kyntu kum ki khun ka Balang ki dei ban san haka jingim da ka jingdap ïa U Khrist ha ka jingïalong kawei bad kiba sngewrit. Ha kaba pynkut ka khot ïa ki parabangeit da kaba ong ha ka jingim briew ‘ngi donkam ïa ki jingbam ba kynja mynsiem’, kata ban long kiba minot ban pule ïa ka ktien U Blei, ban duwai bad kumjuh ha ki jingïaseng lang.
Ha kane ka jingïaseng la ïoh ruh ki jingrwai kyrpang na ka Jingïaseng Kynthei bad ka Choir jong ka Jingïaseng Samla ka Balang.
