“To bat skhem ïa kata kaba pha don” ka phang jong ka Women’s Sunday-2023
Ïa ka taïew jong ki longkmie ne ka ‘Women‘s Week & Women’s Sunday-2023’, ïa kaba la buh beit buh ryntih da ka Khasi Jaiñtia Presbyterian Assembly ban rakhe manla u snem kala poi noh sha kaba kut mynta ka sngi U Blei.
Ïa kane ka taïew la rakhe ha kylleng ki bynta jong ka Ri Khasi Jaiñtia bad kumjuh sha ki jaka rithor kiba hap hapoh ka jingpeit jong ka KJP Assembly, Kane ka taïew ki longkmie la sdang naduh ka sngi nyngkong jong ka 10 tarik u Naitung bad pynkut mynta ka sngi U Blei 16 tarik u Naitung, 2023 halor ka phang kaba ong “To bat skhem ïa kata kaba pha don” (Jingpynpaw 3:11).
La rakhe ïa kane ka sngi kyrpang jong ki Kynthei, shi bynta na ka jingkymmaw burom ïa ka lyngkhuh jingdap 175 snem jong ka jinglong Khristan jong ka longkmie ba nyngkong eh napoh Khasi Jaiñtia ka Nabon Sawian ha ka snem 1848.
Ha Balang Presbyterian Khimusniang, Jowai lyngba ka Jingïaseng Kynthei la rakhe ïa kane ka taïew ba kyrpang da kaba pynlong shibun ki prokram naduh ka sngi nyngkong kiba kynthup naduh ka Jingïaseng Paidbah, ka Jingkren plie ïa ka Theme, ka jingïakop Kyntip, ki Drama, ki Jingïaseng Ïalap nalor kiwei de.
Mynta ka sngi ha ka Jingïaseng Paidbah haka por 1 baje nohphai sngi ïa ka khubor na ka ktien u Blei la sam da ka kong Conquestina Lyngdoh, kaba la kren halor ka phang jong kane ka jingrakhe kaba ong “To bat skhem ïa kata kaba pha don” (Jingpynpaw 3:11).
Ka kong Lyngdoh kaba pynsngew shaphang ka khubor sha ka Balang Philadelphia kaba don ïa ka nongrim kaba skhem wat lada kane ka Balang ka ïakynduh shibun ki jingeh hynrei ka long pat ka Balang kaba ïaishah bad kaba pyndem ha U Blei ba un ri kyndon ïa ka.
Ha kaba ïadei bad kane ka khubor ka kong Lyngdoh kala buh ha ki lai bynta ha ka jingim kiba ngeit kum ki khun Khristan, kata ka dei ban don ïa ka bor ka Jingngeit, kaba ar ban don ïa ka Jingshisha bad kaba lai ban long kiba ïaineh ha ka jingshakri.
Ha kane ka jingïaseng la ïoh ruh ki jingrwai kyrpang na ka Jingïaseng Kynthei bad ki Choir jong ka Jingïaseng Samla ka Balang.
