Ïa ka taïew ki longkmie ne ka ‘Women‘s Week & Women’s Sunday-2024’, ïa kaba la buh beit buh ryntih da ka Khasi Jaiñtia Presbyterian (KJP) Assembly ban rakhe manla u snem kala poi noh sha kaba kut mynta ka sngi U Blei 21 tarik u Naitung.
Ïa kane ka taïew la rakhe ha kylleng ki bynta jong ka Ri Khasi Jaiñtia bad kumjuh sha ki jaka rithor kiba hap hapoh ka jingpeit jong ka KJP Assembly, Kane ka taïew ki longkmie la sdang naduh ka sngi nyngkong jong ka 15 tarik u Naitung bad pynkut mynta ka sngi U Blei 21 tarik u Naitung, 2024 halor ka phang kaba ong “To thied ïa ka jingshisha bad wat die ïa ka” (Proberb- 23:23).
Ha Balang Presbyterian Khimusniang, Jowai lyngba ka Jingïaseng Kynthei la rakhe ïa kane ka taïew ba kyrpang da kaba pynlong shibun ki prokram naduh ka sngi nyngkong kiba kynthup naduh ka Jingïaseng Paidbah, ka Jingkren plie ïa ka Theme, ka jingïakop Kyntip, ka Drama, ki Jingïaseng Ïalap nalor kiwei de. Mynta ka sngi ha ka Jingïaseng Paidbah haka por 1 baje nohphai sngi ïa ka khubor na ka ktien u Blei la sam da ka kong Bahundalyne Mawroh, kaba la kren halor ka phang jong kane ka jingrakhe kaba ong “To thied ïa ka jingshisha bad wat die ïa ka” (Proberb- 23:23).
Na ka liang ka kong Bahundalyne Mawroh kala ong mynta ki sngi ‘duna eh kiba kren ïaka jingshisha’, kumta ka donkam ïa ki khun Khristan ban im ha ka jingshisha kum ki khun U Blei.Shuh shuh kala pynsngew ba ka phang mynta u snem ka don ar bynta ‘To thied’ bad ‘Wad die’ ïa ka jingshisha, da kaba buh ïa ki bynta ba kongsan halor ka jingshisha kita ki long: ka jingshisha ba kynja mynsiem, ka jingshisha ha ki jingjia, ka jingshisha ha ki jingïadei bad kiwei pat, ka dor jong ka jingshisha, ka jingmaham ba wat die ïa ka bad kaei ka nong jong ka jingshisha.Kala buh ruh ka jingkyntu ïa ki para bangeit ïa kine ki kyntien “Katba ngim pat poi ïing bneng, ngin ïaleh katba lah ban pynkhraw ïaka burom u Trai Jisu ha ka jingshisha”.
Ha kane ka jingïaseng la ïoh ruh ki jingrwai kyrpang na ka Jingïaseng Kynthei bad ki Choir jong ka Jingïaseng Samla ka Balang, katba ha ka por 7 baje janmiet la don ka jingïaseng khawai jingrwai (Singing Festival), ryngkat ka jingsam khusnam sha kiba jop ha ki jingiakop bapher bapher.
