Mynta u snem ïaka taïew lehkmen ki Samla Khristan ne ka ‘Youth Week & Youth Sunday-2025’, la rakhe ïa ka halor ka phang pdeng (Theme) kaba ong “U Jisu ka nongrim jong ka jingim” (1 Korinth 3:11) ïa kaba la buh beit buh ryntih da ka Jingïaseng Samla Khasi Jaiñtia Presbyterian (KJP) Assembly bad mynta ka sngi U Blei kala poi noh sha kaba kut.
Ïa kane ka taïew la rakhe ha kylleng ki bynta jong ka Ri Khasi Jaiñtia bad kumjuh sha ki jaka rithor kiba hap hapoh ka jingpeit jong ka KJP Assembly, ïa kane ka taïew ki Samla la sdang rakhe naduh ka sngi nyngkong jong ka 1 tarik u Nailur bad pynkut mynta ka sngi U Blei 7 tarik u Nailur, 2025.
Ha Balang Presbyterian Khimusniang, Jowai lyngba ka Jingïaseng Samla la rakhe ïa kane ka taïew ba kyrpang da ki prokram bapher bapher naduh ka sngi nyngkong kiba kynthup ïa ka Jingïaseng Paidbah ka Jingkren plie ïa ka Theme, ka Visual Bible Quiz Competition, ka jingkren Sub Theme, ka Question Hour Panel Discussion, ka Cultural Programme, ka Social Work, ka Futsal, ka Singing Competition nalor kiwei kiwei de.
Katba ha ka Jingïaseng Paidbah mynta ka sngi U Blei ha ka por 1 baje nohphai sngi ïa ka khubor na ka ktien u Blei la sam da ka Rev. Wallambok Wahlang da kaba pynshong nongrim na ki Proverb 23:26 “Ko khun, to ai ha nga ïa ka dohnud jong me bad to ai ba ki khmat jong me kin sngewbha ha ki lynti jong nga”.
Ha kaba u pastor u ban jur halor ki ar tylli ki kyntien ha jingim kum ki khun Khristan kata ban long kiba (khmih bad mad) ïa kiei kiei kiba U Blei ula leh bha na ka bynta ka jingim. Shuh shuh ula kyntu ïa ki parabangeit ban long kiba don ka nongrim ha ka jingim da kaba aiti lut ïala ka dohnud ha u Trai kynrad bad ban shakri ïa u naduh ka mynsiem.
Ha kane ka Jingïaseng la ïoh ruh ki jingrwai kyrpang na ka Choir jong ka Jingïaseng Samla ka Balang, katba haka por 7 baje jammiet kala don jingïaseng khawai jingrwai “Singing Festival”.
Katba ha ka tnat Balang Khliehlamcha Khimmusniang pat ha ka jingiaseng ha ka por 12:30 haduh 1 baje mynsngi la don ka Singing Inspiration bad bud sa ka jingiathuhkhana na u T.Bn J.M. Paswet.
