Ka lehñiam Durga Puja jong ki riewngeit Hindu, kaba ju long manla u snem kaba la shim bynta lang da baroh ki riew ngeit Hindu hapoh ka ri, bad hangne ha nongbah Jowai ruh kala poi noh sha kaba kut mynta ka sngi 24.10.2023, ha kaba ka jinglehñiam ka long kaba iaid beit iaid ryntih ba la shim bynta da ki nongialam ka Puja Committee, ki riewngeit Hindu kynthup naduh longkmie ki longkpa ki khun samla bad ki hep kiba rit.
Ha kane ka sngi khadduh la leit rah ban pynngam um ia ka blei Durga ba la shna kyrpang ha ki bynta ka wah Myntdu ha ryngkat ka risa bad ka nguh ka dem blei, hadien ba la dep pynngam um ia ka blei, la teh ia ka da u tyllai khang ba lashai yn leit pynkhuid ia ka, ha ka jingiadei ban pynneh pynsah ia ka jingkhuid jingsuba jong ki um ki wah.
Ha kane ka sngi la wan ban sakhi naduh ki ophisar na ka tnad pulit bad na ki bor pynïaid District ha ryngkat ki paidriewngeit Hindu.
Ia kane ka juh ka lehniam hapoh West Jaiñtia la pynkut kymjuh ha Nartiang kaba dei ka lehniam Durga Puja ki Pnar, ha Dawki bad ha Muktapur. Kumjuh ruh ka East Jaintia Hills District la leh ia kane leh niam ha Khliehriat bad ha kiwei de ki jaka.
