–Ka jingshongkha khynnah ka dei ban long 18 ki khynthei bad 21 snem shaneng ia ki shyrang: DG Kharshiing–
Ka jingai jinghikai kumjuh ruh ka jingpynsngewthuh paidbah ne ka awareness drive kaba lai sngi halor ka phang Prevention of ChildMarriage hapoh ka “100 Days District-Wise Action Plan”, ha Meghalaya ka la poi sha kaba kut ha kane ka 27 tarik Rymphang ha shnong Dawki, kaba hap hapoh ka Amlarem Sub-Division.
Kane ka campaign kaba iadei bad ka NALSA (ASHA) SOP bad ka “Nationwide Bal Vivah Mukt Bharat Campaign”, la dep ban pynlong ha kine ki sngi kiba la dep mynshwa ruh ha ki iew Amlarem bad Muktapur bad kiwei ki jaka, ban kyntiew ia ka jingtip bad jingsngwthuh jong ki paidbah halor ki aiñ bad ka bynta jong ka imlang sahlang ban pyrshah ia ka jingshong kha khynnah.
Haba ai jingkren ha kane ka prokram, ka kong D.G. Kharshiing, kaba long ka Chief Judicial Magistrate cum Secretary, District Legal Services Authority, West Jaiñtia Hills, ka la ban jur halor ka jingpyntreikam pyrkhing ia ka Prohibition of Child Marriage Act, 2006, da kaba pynkynmaw ba ka rta shongkha katkum ka aiñ ka long 18 snem na ka bynta ki kynthei bad 21 snem na ka bynta ki shynrang. U Dr. R. Laloo, Medical Officer hapoh ka Rashtriya Bal Swasthya Karyakram (RBSK), u la batai shaphang ki jingma ha ka koit ka khiah kiba lah ban mih na ka shongkha khynnah bad ka jingpun jingkha kaba dang khynnah ha ka rta ba dang rit kan wanrah shi ki jingeh bad jingma.
La pynlong ruh ia ka RBSK outreach ha Dawki Bakur, da kaba ai jingsumar ei bad ka health check-up na ka bynta ki khynnah naduh 0 haduh 18 snem ka rta. Ki ophisar na ka District Legal Services Authority (DLSA), District Child Protection Unit (DCPU), Child Helpline 1098, One Stop Centre bad District Social Welfare Department ruh ki la ai jingkren halor ki jingïada ia ki khynnah katkum ka aiñ, ki rukom iada ia ki khynnah bad ki skim jingiarap kum ka PMMVY.
Ha kane ka prokram la sakhi ia ka jingwan bynta shitrhem ki paidbah kiba naduh ki nongialam shnong, ki Self Help Groups (SHGs), ki samla bad ki nongshong shnong, da kaba jingthmu kaba skhem ia ka jingiatreilang ban pynduh jait ia ka shongkha khynnah ha ka Sub-Division Amlarem.
