Ka Meghalaya Youth Exchange Programme 2023 ba la pynlong da ka Directorate of Sports & Youth Affairs kaba la sdang naduh ka 16 tarik u Risaw, 2023 ha kaba kumba 700 ngut ki samla na baroh ki 12 tylli ki District ka jylla ki la ia wan ban shim bynta lang, ka la kut noh hynnin ka sngi ka 20 tarik u Risaw, 2023.
U myntri ka tnad Sports & Youth Affairs u Bah Shakliar Warjri, u la long u kongsan ha ka sngi pynkut ia kane ka programme, ha ryngkat ka jingiadon lang i Kong I. Laloo, Director ka Sports & Youth Affairs Department.
Haba kren ha kane ka jingialang, u Bah Shakliar Warjri ula pynpaw ia ka jingsngewkmen kaba khraw ban iohi ia ka jingshit jingmut bad ka jinglah jong ki samla ban pyni paidbah ia ki sap ba ki don lyngba kane ka prokram. U la kyntu ia ki nongiashim bynta ban shim ia kane ka rynsan kum ka lad bad ka kabu ban nang kham tip shuh shuh na kiwei ban kyntiew bad ban pynriewspah ia ki sap bad ban tip ia ki rukom hikai jong ki jaitbynriew ba bapher ka jylla.
U Myntri ula kdew ruh ia shibun tylli ki lad ki lynti ba ka sorkar jylla ka la shim bad pynwandur ban ai bor bad kyntiew ia ki sap ki phong jong ki samla ka jylla bad khamtam eh ban pynbha ia ka jinglong tynrai ka jong ki.
Ha kane ka jingrakhe ba baroh shitaiew, la pynlong ia ki jingiakob kiba bun kum ka jingiakob rwai ia ki sur tynrai bad ki rukom shad tynrai, ka jingiakop tem guitar bad ka jingiakob put tangmuri, ka jingiakop ban iatai nia (Debate) bad ki jingiakop kren khlem da pynkhreh lupa (Extempore Speech), bad la pynlong ruh ia ka jingialeh kai halor ka phang “Mission Life”, Talent Hunt bad Adventure Activities.
Ha kane ka prokram, u Kongsan ryngkat bad kiwei pat ki heh sorkar ki la sam ia ki khusnam bad ki certificates sha ki nongjop bapher bapher.
