U Deputy Commissioner (Supply), West Jaintia Hills District ula pyntip paidbah sha baroh ki nongpyndonkam LPG ïa ka rukom book ïa ki tyndong lyer shet (LPG Cylinder), ha kaba la bthah ïa baroh ban pyndep ia ka DAC bad ka e-KYC ha la ki jong ki jaka sam Gas jong ki shnong bapher bapher hapoh ka District khnang ban lait na kano kano ka jingthut ha ka rukom pynïoh ïa kine ki tyndong lyer shet.
La pyntip ba ka booking yn shah tang hadien 25 sngi ha ki jaka sor bad 45 sngi ha ki jaka nongkyndon, naduh ka sngi ba ki ïoh khadduh ïa ki tyndong LPG. Ha kaba la kyntu ïa ki nongpyndonkam ba kim dei ban book ha shwa katei ka por bad ki dei ban da peit shwa ïa ka sngi ba ki ïoh khadduh bad ñiew hadien ba la kot kitei ki sngi te kin sa lah ban book thymmai.
La pyntip ba kane ka jingpynbeit booking ba shipor ka lah ban khapngiah, kumta la kyntu ïa ki nong pyndonkam gas ba ki dei ban book lyngba ki Whatsaap Booking, Indian Oil One (Mobile App) bad ha ka Customer Portal: cx. indianoil.in.
Ka por kaba biang eh ban book ka dei hadien jong ka 6:00 PM. Katba kito kiba book naduh ka por 10:00 PM haduh 6:00 AM yn sa pyntreikam ïa ka booking jong ki hadien ka 6:00 AM jong ka sngi ba bud.
Kumta u DC (Supply), West Jaintia Hills District ula kyntu ïa baroh ki nong pyndonkam gas ba kin bud ryntih ïa kine ki jingbthah.
