Ïa u Rev. Fr. Ferdinand Dkhar, DD uba dei u Bishop Lyngdohsad Bathymmai jong ka Jowai Diocese la pynkyntang Bishop ba pura mynta ka sngi U Blei ka 1 tarik Risaw, 2023 ha Church of the Holy Spirit Parish Ummulong, West Jaiñtia Hills haka por 10 baje Mynstep.
Ha kane ka sngi da ki hajar ki paid riewngeit jong ka Balang Katholik na kylleng ka jaka kila wan tuid sha kane ka jingïaseng pynkyntang Bishop Lyngdohsad Bathymmai ïa u Rev. Fr. Ferdinand Dkhar, DD da u Most Rev. Victor Lyngdoh DD, u Archbishop jong ka Jyllañiam Bah Shillong.
La wan sakhi lang ruh naduh ki nongïalam saiñ hima sima jong ka jylla, kynthup naduh u Myntri Rangbah ka Jylla, u MP ka Shillong, ki myntri sorkar, ki MLA, ki MDC, ryngkat ka jingïasynran lang ki Bishop jong ka thaiñ shathei lam mihngi, ki lyngdoh, ki Sister nalor kiwei de.
Kum ban shu pynkynmaw la kha ïa u Rev. Fr. Ferdinand Dkhar haka 26 tarik Rymphang, 1962 haka shnong Ïongkaluh – East Jaiñtia Hills. I dei i khun Phrangsngi na ki 10 ngut ki khun jong i Ma Edwin Kyndait bad i Kong Philomina Dkhar. La Pynkyntang Lyndoh Sohblei ïa u ha ka 23 tarik Kyllalyngkot, 1994.
Hadien ka jingïaseng Mass Kyntang Lyngdoh haka por shiteng sngi kala don ka Jinglehniañ mane Sakramen, ha kaba na ka liang u Rev. Fr. Ferdinand Dkhar, DD ula pynsngew ïa ki kyntien kiba ong “ha U Blei baroh ka long kaba lah”, ula ïathuh naduh ba sdang ban rung sha kane ka kam jingshakri ïa ka Hima u Blei kum u Phadar ula aiti shwa ïalade ha U Blei, da kaba pynsngew ruh shaphang ki synran u Jisu kiba la kloi ban bud ïa U ha ka kam ïalap da ka jingkhlaiñ ka jingngeit.
Katba ha ka por nohphai sngi kila don ki prokram naduh ka Prayer Dance na ka St. Mary Mazzarello Convent, Jowai, shad pliang na ka Synjuk Kynthai, Jowai Diocese, ka Choir Piece na ka Bl. Joseph Nardini Seminary, Ummulong bad jingshad tynrai na ka Jowai Diocese Catholic Youth Movement, katba ïa ki kyntien ai khublei la ïoh na u Fr. Martin Shylla, Chancellor of Jowai Diocese.
