Da ki phew hajar tuid ki paidbah bad ki paidriewngeit na kylleng ki Parish ka Jowai Diocese bad nabar ka Diocese sha shnong Sanaro sha ka jingpynkyntang Lyngdohsohblei ia u Dikon Richard Shylla. U Dikon Richard Shylla u dei u khun jong u ma (L) Stephan Dhar bad ka kong Glory Shylla kiba shong basah ha shnong Sanaro kaba hap hapoh ka Shnat niam Parish Namdong West Jaintia Hills District. U dei u khun khatduh na ki hynniew ngut shipara. U wan na ka longing longsem kaba duna ka ioh ka kot.
Hadien ka jingpule kaba bun snem bad da ka jingjied jong u Blei mynta ka sngi 11 tarik Kylla-lyngkot 2026, la pynkyntang Lyngdohsohblei ia u da u Most.Rev.Ferdinand Dkhar dd, Bishop jong ka Jylla niam (Diocese) Jowai. Kane ka jingpynkyntang Lyngdohsohblei ia u Richard Shylla ka la pynpura ia ka jingangnud jong u (Richard Shylla) ha ka ban shakri ia U Blei bad iala ki parabriew. U Lyngdohsohblei Richard Shylla u dei u Lyngdohsohblei uba nyngkong eh ba ka “BLESSED JOSEPH NARDINI SEMINARY UMMULONG KA LA PYNMIH” bad u Lyngdohsohblei uba ar ba ka Balang shnong Sanaro ka la pynmih bad uba lai na ka Parish Namdong.
Ha ka por 10 baje mynstep la pynlong ia ka jingknia Mass Iukharist ba la lamkmat da u Most Rev. Ferdinand bad ka jingpynkyntang Lyngdohsohblei ia u Dikon Richard Shylla ha ryngkat ka jingsynranlang jong ki 31 ngut ki Lyngdohsohblei kiba la iawan sakhilang ia kane ka sngi ka bakhraw, ka sngi ka jingpynkyntang Lyngdohsohblei ia u Dikon Richard Shylla na kylleng ka Jowai Diocese bad nabar.
U Bishop Ferdinand haba kren ha kane ka sngi u ong “Ka jinglong Lyngdohsohblei ka long ka jingjied da u Blei hi naba U Trai Jisu u la ong ym dei ma phi kiba la jied ia nga ,hynrei nga kein nga la jied ia phi bad nga la jied ia phi ban leit bad ban pynmihsoh shibun—-(Io.15:16) Nangta U Bishop Ferdinand u ong “Ko Dikon baieid kumba U Jisu u la khot ia phi sha kane ka jinglong Lyngdohsohblei, la khot ia phi sha ka kam Mission jong U ban shakri bad ban ai la ka jingim ban siewspah ia kiba bun”(Mk.10:45) U Bishop Ferdinand ha ka sneng ka kraw ia u Lyngdohsohblei uba thymmai u ong “U lyngdohsohblei u long u Nongiatreilang babitdor jong u Lyngdohsad (Bishop) ha kaba sumar bad bsa ia ki kynhun ‘langbrot jong U Blei hapoh ka jingialam jong u Mynsiem bakhuid, u Nongpynphriang ia ka ktien U Blei da kaba ialap ia ka Khubor babha bad ban hikai bniah ia ka jingngeit Katholik bad ka jingkiew irat ki paid-khristan ha ka jingim blei, ka jingknia Iukharist, ka Sakrament jingpyniasuk bad kiwei de kat kum ka jinghikai pateng jong ka Balang bad u pynkut ia ka jingkren da kaba ong ba ka kam jinglonglyngdoh sohblei ka dei ka kam shakri ia U Blei bad iala ki para briew bad ka jingaiti ialade ha U Blei da ka mynsiem sngewrit bad dem hakhmat u Blei.
