Mynta ka sngi kum shi bynta ban rakhe ia ka “Azadi ka Amrit Mahotsav” ka ophis jong u District Medical and Health Officer, East Jaintia Hills District kala pynlong ia ka Block Level Health Mela ha Pamra-Paithlu PHC kaba hap hapoh ka Wapung C&RD Block.
Ha kane ka prokram la wan ban iadon bynta lang da u Dr. Dominic Shylla DM&HO, East Jaintia Hills District, Khliehriat kum u kongsan. La iadon lang ruh u ma T. Shyla BDO ka Wapung C&RD Block, i Dr. N.P. Suchiang District Immunization Officer I/c, East Jaintia Hills District, Dr. Handaka Suting, DEIC Manager, East Jaintia Hills District, kong R. Passah, District Social Welfare Officer, East Jaintia Hills District, Dr. W. Bamon, Sub-Divisional Medical and Health Officer, East Jaintia Hills District, Khliehriat, bad i Dr. (Ms). R. Suchiang, Medical and Health Officer, I/c Pamra- Paithlu PHC, East Jaintia Hills District nalor kiwei de ki riew rangbah.
Ka thong ba kongsan jong kane ka Health Mela ka long ban pynsngewthuh sha ki paidbah shaphang ki prokram bapher bapher jong ka tnad ka koit ka khiah kum ka jingpyntreikam ia ki Ayushman Bharat Health and Wellness Centres (HWCs), ka jingpyndonkam ia u Unique Health ID hapoh ka ABDM, ka jingpyndonkam ia ki Ayushman Bharat Caard hapoh ka AB-PMJAY, ka jinghikai ban iada ban lait na ki jingpang kiba iabit bad ki bym iabit hapdeng ki para briew, ka jinghikai ban long kiba koit ba khiah bad kiwei kiwei de ki jingai jinghikai kiba iadei bad ka koit ka khiah jong ki paidbah.
Ha kane ka Health Mela haduh 380 ngut ki paidbah ba kynthup ia ki longkmie longkpa, ki khynnah rit, ki khynnah skul bad ki nonghikai kila wan ban iashim bynta. Nalor ki stall jong ka tnad ka koit ka khiah ki don ruh ki stall jong ka ophis District Agriculture Officer bad ka District Horticulture Officer, ka Social Welfare Department, ICDS bad ka Food Safety Officer, East Jaintia Hills District kila iashim bynta lang.
Kala don ruh ka prokram ba kyrpang ha kaba la don ka jingiamir jingmut hapdeng ki briew jong ka tnad ka koit ka khiah bad ki khynnah skul halor ki phang bapher bapher kiba ai jingmyntoi ia ki khynnah skul.