–Wan ïashim bynta haduh 211 ngut ki samla–
Ka Nehru Yuva Kendra Sangathan, Jowai, lyngba ka Ministry of Youth Affairs and Sports jong ka sorkar kmie mynta ka sngi kala pynlong ïa ka District Level Yuva Utsav – India @2047 ba shi sngi ha Government Boys Higher Secondary School, Jowai.
Ka phang jong kane ka prokram Yuva Utsav ka long “PANCH PRAN” bad ka thong ba hakhmat eh ka long ban pynkiew ïa ka Ri India ha baroh ki liang. Ha kane ka sngi u MDC ka Jowai Central ma A. H Andrew Shullai ula long u kongsan ha kaba u Additional Deputy Commissioner, Jowai ma M. A Challam kum u symbud kongsan.
U ma Shullai haba ai jingkren ula ai ka jingïaroh ïa baroh ki nongwan ïashim bynta bad kyrpang ïa ki nongpynlong ïa kane ka prokram, ula ïaroh shi katdei eh ïa ka NYK Jowai kaba la shim ïa kane ka bynta ban ai lad ïa ki samla jong ka District ban pynpaw pyrthei ïa ki sap ki phong jong ki.
Ha ka juh ka por u ai mynsiem ïa ki samla ba kin shim ïa kane ka kabu bad ban pynpaw ïala ki sap ki phong ba ki don ym tang ha kum kane ka sngi hynrei na ka bynta la lawei kumjuh.
Na ka liang u D. Rapsang, Deputy Director, NYKS Shillong ha ka jingkren pdiang ula pynsngew ïa ka jingthmu jong kane ka prokram kaba long kyrpang eh ïa ki samla ban pynpaw pyrthei ïa ki sap ba ki don.
Ula pyntip ruh ba ki khynnah skul na kylleng ki skul jong ka District kin ïashim bynta ha kane ka prokram ki kynthup ha ka Young Artist -Painting, Young Writers-Poetry, Mobile Photography, Declamation Contest bad ka Cultural Festival.
Shuh shuh ula ong ba kiba jop napoh ka District Level kin ïoh ban leit ïashim bynta sha ka State Level ka ban long ha Shillong bad kiba jop na ka State Level kin ïoh ban mihkhmat sha ka National level.
Kiwei de kiba ai jingkren ki long u State Director NYKS Meghlaya u Atul J. Nikam, u Principal Government Boys Higher Secondary School, Jowai bad kiwei de.
Ha kane ka sngi kila don haduh 211 ngut ki samla shynrang bad kynthei na baroh ki lai tylli ki C&RD Blocks jong ka West Jaiñtia Hills District kila wan ban ïashim bynta.
Ha ka bynta kaba ar jong kane ka prokram u Brightstar Chyrmang, MDC Jowai North ula long u kongsan bad u ma H. H Mohrmen kum u symbud kongsan.
Ha kane ka sngi la sam ruh ïa ki khusnam sha ki nongjop lem bad ki Certificates.
Ha ka Declamation Contest la jop nyngkong da ka Paiya Venessa Lyngdoh, ba ar ka Bymonmisalda Lato bad ba lai ka Riiung Langbang, ha ka Mobile Photography la jop da u Ri-O Sari, ba ar u Mekerda Bareh bad ba lai u Marbudki Phawa.
Ha ka Cultural event ka Manchwa kam family kala wan ba nyngkong, ba ar ka Catherine Sna bad ba lai ka Sengkur Suting Welfare Organisation.
Ha ka Young writer contest –Poetry la jop nyngkong da ka Rewa Phawa ba ar i Jied Dkhar bad balai u Teilang Phawa.
