Ha ka jingpyrshang ban ïakhun pyrshah ïa ki jingpang ba shyrkhei ha ki khynnah naduh ba dang kha haduh 18 snem ka rta hapoh ka District, ka ophis jong ka District Medical and Health Officer, East Jaiñtia Hills District ryngkat ka jingïatreilang bad ka Rashtriya Bal Swasthya Karyakram (RBSK), Khliehriat bad ka District Early Intervention Centre, Jowai mynta ka sngi ki la pynlong ia ka Health Screening Camp Cum Awareness halor ki 4Ds (Defect at Birth, Deficiencies, Diseases, Development Delays & Disabilities) ha ka prokram kaba la pynlong ha Khliehriat West Community Hall, Khliehriat.
Ha kane ka prokram la wan ban ïashim bynta da u District Medical & Health Officer ka East Jaiñtia Hills District u Dr D. Shylla ha ka jingïadon lang u Programme Manager jong ka District Early Intervention Centre (DEIC) Jowai i Dr Handaka L. Suting iba dei u District Programme Manager jong ka Rashtriya Bal Swasthya Karyakram (RBSK), Khliehriat, i kong Daphihi Passah, ka Health team na Bansara Eye Care bad ka ENT team na Jowai, ki briew ka thaiñ bad bun kiwei pat.
U Dr D. Shylla ha ka jingkren jong u, u la ïaroh ïa ka sienjam ba la shim da ka Rashtriya Bal Swasthya Karyakram (RBSK), Khliehriat bad ka District Early Intervention Centre, Jowai wat haba u la pynsngewtynnad ïa ka jingïalang ban shim kabu ban ai jingsumar ïa ki khynnah jong ki.
Ka Programme Manager, District Early Intervention Centre (DEIC), Jowai ka Dr Handaka L. Suting ha ka jingkren jong ka ha kane ka prokram ka la pynshai halor ki jingshakri ha ka liang ka koit ka khiah ba la ai da ka DEIC, Jowai bad ka la kyntu ïa ki kmie ki kpa kiba la ïadonlang ha kane ka prokram ban pynrung kyrteng ïa la ki khun khnang ban ïoh ïa ka jingkyrshan jingsumar ba la ai da ka DEIC.
La pyntip ruh da ki heh ka tnad ka koit ka khiah ba kane ka sienjam ka thmu ban kyntiew ïa ka koit ka khiah jong ki khynnah rit ban lap kloi ia ki jingpang bad ka jingsumar bad ban pynrung kyrteng ïa kito ki bym pat ju leit sha ka District Early Intervention Centre. (DPRO, Khliehriat)
