Kum shi bynta jong ka programme kaba lai jong ka 100-Days Intensive Awareness Campaign for a Child-Marriage Free Bharat, hapoh ka National Legal Services Authority (NALSA) ASHA SOP bad ka Bal Vivah Mukt Bharat Campaign, ka District Legal Services Authority (DLSA), East Jaiñtia Hills kala pynlong ar tylli ki prokram Legal Literacy Programmes-cum-Street Plays ha ka shnong Mooknor bad Khahnar kiba hap hapoh ka Saipung C&RD Block.
Ïa kane ka prokram la wan ban ïashim bynta da ka Chief Legal Aid Defence Counsel Smt R. Manar, ka Counsellor jong ka District Child Protection Unit (DCPU) Smt V Langstang, ki Legal Aid Defence Counsels, Legal Aid Counsels, ki PLVs bad ki nongtrei ka DLSA.
Haba kren ha ka jingïalang, ka kong Manar kala batai bniah shaphang ki bynta ba kongsan jong ka Prohibition of Child Marriage Act, 2006 bad ka POCSO Act, 2012, da kaba ong ba kito kiba pynshlur ne pynïaid be-aiñ ïa ka jing shongkha khynnah kin ngat ha ka aiñ bad ka kuna. Ka la kdew ruh ba ka shongkha khynnah ka ktah jur ïa ka koit ka khiah, ka pule puthi bad ka lawei jong ki khynnah bad ka la kyntu ïa ki paidbah ban ai jingpyntip lada don kano kano ka jingjia kum katei, lyngba ka Child Helpline 1098 bad ka Toll-Free Number 15100.
Ka kong V. Langstang pat kala kren shaphang ki jingktah kaba jur jong ka jingpun khun kaba khynnah (teenage pregnancy), da kaba kdew ba ka ktah ïa ka jingmut jingpyrkhat bad ka jingsngew jong ki khynnah bad ki longïing. Ka la ai jingmut ïa ki kmie ki kpa ban don ka jingïakren ba shai bad sngewthuh bad ki khun jong ki ha kaba iadei ban lait na katei ka jingjia.
Ha ka street play kaba pyni paidbah, la pynpaw ïa ki jingktah kiba don ha ka liang ka aiñ bad ka imlang sahlang halor ka jing shongkha khynnah, ha kaba la pyni kumno ka jing shongkha jong u/ka khynnah ka wanrah ïa ki jingeh ba har rukom.
