Ka ophis District Disaster Management Authority, West Jaiñtia Hills District, Jowai ha ka 5/3/2025 ryngkat ka jingïatreilang bad ka ophis Fire Service & Emergency Jowai, ophis jong u Superintendent of Police, Civil Defence bad District Medical & Health Officer, Jowai ki la pynlong ïa ka jinghikai kaba bniah halor ka jingpynkhreh ban iada halor ka jingshah lynshop ha ki bor mariang ha MCH, Panaliar, Jowai
U ma Dari Lyngdoh uba dei u District Disaster Management ophisar u la pynpaw ba ka jingthmu ba hakhmat eh jong ka jingpynlong ia kane ka orientation program bad ka Mock drill ka long ban kyntiew ia ka jingpynkhreh haba jia ki jingjia ba sngewsih bad ka jinglah ban iarap kyrkieh hapdeng ki nongtrei jong kane ka Hospital.
U Station Officer (SO), u Anthony Rymbai, na ka ophis jong ka Fire Service and Emergency u la batai bniah halor ki lad jingïada na ka jingpluhding bad ka jingpyndonkam ïa ki tiar pynlip ding da kaba pyni ïa ki jait tiar pynlip ding bapher bapher bad ka jingbthah kumno ban pyntreikam ïa ki ha ka por ba don ka jingjia ba kyrkieh.
U ma F. Lamare na ka tnat Civil Defence u la pyni ia ki rukom wad bad ka jingpyllait im ba la shna kyrpang, ka jingpyniaid ia kiba mynsaw, ka jingpyndonkam ia ki tiar ban rah bad ka rukom pyllait im ba la shna kyrpang bad ka jingpynthikna ia ka jingpynkynriah ia ki nongpang da kaba suk.
U nongai jingkren na ka ophis jong u Superintendent of Police u la ban jur ia ka bynta jong ki pulit ban pynneh ia ka suk ka saiñ, ban iarap ha kaba pynkynriah ia ki briew bad ban teh lakam ia ka jingkulmar jingmut jong ki paidbah ha ka por ba don ki jingjia ba kyrkieh.
Ka Dr. (Mrs)Embhah Chullet, Medial Superintendent ka MCH ka la pynpaw ba ka jingai jinghikai bad ka mock drill ba la pynlong kan ïarap shibun ïa ka Hospital Disaster Management Team bad ki nongtrei ka Hospital ba kin sngewthuh kham bha ïa ki kamram bad ki jingkitkhlieh jong ki ha ka por ba don ki jingjia ba kyrkieh.
