Ka Directorate of Commerce and Industries hynnin ka sngi ka la pynlong ia ka prokram iasaid kaba shisngi bad ka jingiakren ha kaba ia dei bad ka jingpyntreikam ia ka Competition Act, 2002; ha ryngkat ka jingiatreilang bad ka Competition Commission of India Advocacy. Ki heh ophisar na ki tnad bapher bapher ki la wan ban ïashim bynta ha kane ka jingïalang, kaba la pynlong ha conference hall jong ka Directorate.
Haba ai jingkren ha kane ka sngi, u Commissioner bad Secretary ka tnad khaïi pateng u Pravin Bakshi u la ong ba ka thong jong kane ka prokram ka long ban pynsngewthuh ia ki nongiashimbynta halor ka jingtreikam jong ka Competition Commission of India (CCI). Ka CCI, katkum ka kyndon 49(3) jong ka Competition Act, 2002, ka la pynlong ia ki jingialang bad ki jinghikai na ka bynta ki nongshimbynta, kynthup ia ki heh sorkar pdeng bad ki heh sorkar jylla.
U IAS ophisar barim u B. Hajong u la ai ka jingbatai bniah halor ki bynta jong kane ka aiñ. Ka Competition Act, 2002, ka la thaw ia ka Commission ban khanglad ia ki jingleh pyrshah ia ka jingiakop, ban kyntiew bad ban pynneh ia ka jingiakhun ha ki iew ki hat, ban iada ia ki jingmyntoi jong ki nongthied nongpet, bad ban pynthikna ia ka jinglaitluid ha ka khaïi pateng, da kaba pyrkhat ia ka roi ka par jong ka ri India.
