Mynta ka sngi ka ophis jong ka District School Education Officer (DSEO), East Jaintia Hills District kala pynlong ia ka prokram kaba la tip kum ka Understanding of Lifelong Learning for All in Society (ULLAS) Mela 2025, ha Khliehriat West Community Hall, Khliehriat.
Ka phang pdeng jong kane ka prokram ULLAS ka long “A Step Towards Literate India”, kaba long shi bynta ban pynkupbor ia ki nongshong shnong kiba la kot ia ka rta kaba 15 snem shaneng kiba don ha ki bynta bapher bapher kiba la duh noh ia ka jingpule jong ki shiteng por, khnang ba kin long ki nongshong shnong kiba lah pat ban synniang sha ka bha ka miat jong ka imlang ka sahlang.
Ha kane ka prokram la wan ban iadon ryngkat da i ADC, East Jaintia Hills District i kong J.U. Kharpuri, u BDO ka Lumshnong C&RD Block ma Marioki Kyndait, i DSEO, East Jaintia Hills District kong A.P. Syiem, ki nongmihkhmat na ka State Centre For Literacy – State Literacy Mission Authority (SCL-SLMA), Meghalaya, Shilloong kong Barikor Syiem, u SDSEO ka District nalor kiwei de.
Ka kong Kharpuri haba ai jingkren ka pynpaw ba ka jingnang jingstad ka long ka atiar ban pyndonkam tam ha ki liang bapher bapher la ka dei ha ka kam khaïi pateng, ka rep ka riang ne ka kano kano ka kam ba trei. Ka kyntu bad pynshlur ia ki nongshong shnong ba ki pynrung ialade hapoh kane ka prokram ULLAS khnang ba kin ioh ia ki jinghikai ba biang ha ka jingim jong ki.
Ka kong Syiem DSEO ka pynpaw ia ka jingjop jong kane ka prokram lyngba ka jingtreishitom jong kito kiba don bynta ha kane ka kam. Ka pynkynmaw ba kane ka prokram kan bteng haduh u snem 2027 da ka jingthmu ban pynrung haduh 12,000 ngut ki briew hapoh East Jaintia Hills District hapoh u snem 2027. Kumba long haduh mynta kila don 7731 ngut ki nongpule kiba la pyndep lyngba ka ULLAS hapoh kane ka District.
Ha kane ka sngi ka la don ruh ka jingpynbyrngia lyngba ki jingrwai da ki khynnah skul jong ka Oxford Secondary School, Lad-Rymbai bad ki nongpule ka ULLAS na ka shnong Samasi. Ka la don ruh ka jingsam syrnot sha baroh ki nongpule ka ULLAS kiba la pyndep ia ki jingpule.
