Ki bor pynïaid District jong ka West Jaiñtia Hills mynta ka sngi 4/3/2022 kila pynlong ia ka jingpynsngew paidbah ‘Public Hearing’ ha kaba ïadei bad ka jaka bret ñiut (Sanitary Landfill Site) kaba don ha Mooshutsdai, Thadmusem kaba dang hap hapoh ka Elaka Nartiang West Jaiñtia Hills District ïa kaba la ibit da ka Task Force Committee jong ka sorkar ban pynlong kum ka jaka bret ñiut.
Ïa ka jingïalang (Public Hearing) ha kane ka sngi la pynïaid da u Deputy Commissioner bah Garod LSN Dykes (IAS). Ha ka jingialang bun na ki paidbah nongshong shnong kiba kynthup ïa ka Thadmusem, Nongkhroh, Larnai, Sohphoh bad Mookabeng kila ïeng pyrshah jur ïa kane, khamtam ki ar shnong ka Thadmusem bad Nongkhroh kiba dang shañiah umbam na katei ka jaka ba thmu pynlong jaka bret ñiut. Ha kaba kila kyntu ia ka sorkar ban weng ia kane ka jingthmu jong ka.
Hashwa kane la don ka jingpynsngewthuh halor ki rukom treikam jong ka ‘Sanitary Landfill Site’ ha kaba ka sorkar kan ïaleh ban pyntrei ïa kane ka jaka katkum ki juk stad ba mynta ka ban ym ktah satia ïa ka mariang bad ki sawdong sawkun bad kan long ruh ka jingmyntoi ia ki nongrep na ki sboh ki ban sa pynmih na kane ka jaka.
Ha kaba ïadei bad kane ka Public Hearing la pyntip ba na ka liang ki bor District hadien ba la dep pynlong ïa ka, kin sa shim ïa ka report bala ïoh lum mynta ka sngi ban aiti beit beit sha ka sorkar khnang ba kan ïoh leh ïa kaba donkam.
