Ka office jong ka Meghalaya Basin Management Agency (MBMA) District Project Management Unit-CLLMP, East Khasi Hills ha ka jingiatrei lang bad ki bor District mynin ka sngi ka 6 tarik u Nailur, 2023 ka la pynlong ia ka jingiashim bynta ha ka Rural Appraisal (PRA) programme ha Phudmyrdong B kaba hap hapoh ka Mawphlang C&RD Block.
I kong R.M. Kurbah, Deputy Commissioner ka East Khasi Hills iba long ruh i Chairman ka District Project Management Unit, East Khasi Hills District i la ia don lang ha katei ka sngi kum ka Kongsan. Haba ai jingkren ha kane ka jingialang, i Deputy Commissioner i la ban jur halor ka jingdonkam ia ka jingiatrei lang, da kaba kren ban ba ka shnong kaba rit kum ka Phudmyrdong-B, kaba don 70 tylli ki ïing ki sem, ka lah ban pynioh ia ka roi ka par lyngba ka jingiatrei lang hapdeng ki nongshong shnong bad ka jinglah trei ki nongialam.
I la pynshlur ia ki khynnah samla ban pyndonkam ia ka sap jong ki kum ka lad kamai ja kpoh bad tyrwa ruh ban pynbiang ia ki rukom jinghikai ban iarap ban shut ia ka jingtbit bad ka buit jong ki bad i la batai bniah ruh ia ka jingdonkam ki kmie ki kpa ban pyntikna ba ki khun jong ki kiba hapoh ka 14 snem rta ba ki dei ban don ha ki jingpule jong ki ha ki skul.
I la kyntu ia ki nongshong shnong ban trei shitom ban wanrah ia ka jingkylla ia ka shnong jong ki ban long ka nuksa ia kiwei pat ki shnong bad ban shim khia halor kane ka phang. I la ban jur ruh halor ka jingdonkam ka koit ka khiah da kaba pyni kumno ka jingkoit jingkhiah ka nohsynniang sha ka ioh ka kot bad kumta ter ter.
Shuh shuh, i la pynshlur ia ki kmie ki kpa ban pyntikna ba ki khun jong ki, kin don ia ka met kaba shait ba khlaiñ da kaba pynioh ia ki ia ki injekshon ban iada na kino kino ki jait jingpang bad batai bniah ruh ia ka jingdonkam ban pynneh pynsah ia ki jingtei jingsat kiba don ha ka shnong na ka bynta ka jingioh myntoi ha ki sngi ki ban dang wan.
I Deputy Commissioner i la ai jingmut ruh ia ka shnong ban da leh ia ki test na ka bynta ka khyndew ban sngewthuh bad tip kiba kum kino ki jait jingthung kiba lah ban thung kiban pynmih ka jingmyntoi kaba biang bad kyrshan ruh ia kawei pa kawei ka longing khamtam eh ia ki Aganwadi center ban thung bad pynmih ia ki jingthung jingtep jong ki baroh shi snem lynter.
Ha kane ka programme, i Deputy Commissioner i la plie paidbah ruh ia ka kamra ai jinghikai (Training Hall) ha ka jingiadon lang u Chairman ka Phudmyrdong-B, Bah Laibodsing Kharphuli, ki nongtrei ka DPMU bad ki nongshong shnong ka Phudmyrdong.