Ka District Mission Management Unit, West Jaintia Hills ha ryngkat ka jingiatreilang bad ka ophis Block Development Officer, Amlarem C&RD Block kila pynlong ia ka Seft-Help Group Mela cum Health Camp na ka bynta ki dkhot jong ki Self Help Group bapher bapher jong kane ka Block, ha kaba ia ka jingialang la pynlong ha Enowel Hall Playground, Amlarem mynta ka sngi.
Kane ka prokram ka dei shi bynta na ka jingrakhe ia ka jingdap 50 snem jong ka jingioh jylla ba pura ka Meghalaya ia ka yn sa rakhe burom ha ka 21 Kyllalyngkot 2022.
Ia kane ka Mela la wan ban plie da u Home Minister ma Lahkmen Rymbui uba dei ha ka juh ka por u MLA jong kane ka thaiñ.
Haba kren ha ka jingialang u ma Rymbui u la ong ba lyngba kane ka prokram ka sorkar ka thmu ban pynkupbor ia ki kynthei ba kin don ka jingshaniah halade ne ban ieng ha la ki ktaj la jong. U la pynshlur ruh ia ki dkhot ba kin nang thaw shuh shuh sa kiwei ki SHG na ka bynta ban kyntiew ia ka longbriew manbriew jong ki kynthei ha ki nongkyndong.
U ma Rymbui ula pyntip ba ka sorkar lyngba ka prokram ba la tip kum ka FOCUS kala iarap shibun ban pynheh shuh shuh ia ka jingpynmih jong ki nongrep.
Shuh shuh u ma Lahkmen u kren ruh halor ka roi ka par jong ka jylla Meghalaya bad ka jingdap 50 snem ka jingioh jylla jong ka, khamtam eh ha ki thaiñ Amlarem Sub-Division. Ula kde ia ki katto katne ki jinglah jong kane ka sorkar ban pynbha kum ha ka liang ka Koit ka khiah, ki lynti ki syngkieng bad ka pule ka puthi. U la ong ha ha shwa ba ka jylla ka ioh ia ka jylla la jong ka dang don tang kawei ka Dispensary ha Nongtalang ia kaba la kyntiew kyrdan mynta sha ka CHC bad ha kine ki 50 snem la lah ban buh haduh 3 tylli ki PHC, ha Dawki, ha Jaraiñ bad ha Pdengshakap, kawei ka Dispensary ha shnong Padu bad ki Sub-Centre la jan manla ki jaka. U la pyntip ruh bad la jan man la ki shnong hapoh kane ka Sub-Division la lah ban pynioh surok, lait noh sa tang ka shnong Kamsing bad ka shnong Kongwang.
Ha ka jingiadei bad ka pule puthi mynta la don ar tylli ki Government Higher Secondary School, ar tylli ki Upper Primary School kiba la kyntiew kyrdan sha ka RMSA ha shnong Trangblang bad Skhempyrsit. Ka Nongtalang College ka dei kaba la ioh jingithuh da ka UGS bad la pynhap kyrdan ia ka ha ka Grade B da ka NAAC kaba dei kaba nyngkong eh ban ioh hapoh ka District West Jaintia.
U ma Lahkmen ula ban jur ruh halor ka jingdonkam ban ioh ia ka tika Covid-19 bad kyntu ruh ia ki longkmie ba ar-met ba ki dei ban sumar bha ialade da kaba leit mih sha ki jaka sumar manla ka por. U la bun jur ruh ha kaba iadei bad ka jinglehkhuid.
Kham ha shwa u Dr. D. Lyngdoh, Block Development Officer Amlarem C&RD Block u kren pdiang sngewbha ia baroh kiba la poi sha kane ka prokram bad ruh sha ki 460 tylli ki SHG kiba don hapoh kane ka Sub-Division.
Kiwei de kiba ai jingkren ha kane ka jingialang ki kynthup ia u Deputy Commissioner, West Jaintia Hills ma Garod LSN Dykes IAS, u Sub-Divisional Officer, Amlarem Sub-Division Shri. Abhilash Baranwal bad u COO-Programme ka MSRLS u bah R. Kynta.
Ha kane ka jingialang la sam ia ki Syrnod sha SHG kiba lah ban treibha, sha ki shnong kiba ai ka jingiatreilang ba 100 % bad ki SHG bad ruh sha ki SHGs ne ki VOs kiba la kynjoh 90-100 % ka jingai tika COVID-19.
