Ïa ka 1st West Jaiñtia Hills Book Fair’ kaba ar sngi lynter la plie paidbah mynta ka sngi Thohdieng ha District Library, Mynthong Jowai, da u Myntri ka tnad ka Koit ka Khiah u ma Wailadmiki Shylla haka jingïadon lang u Deputy Commissioner ka WJHD u Abhinav Kumar Singh, IAS. Ha kane ka sngi u Myntri ula leit jurip ïa ki stall bad ïoh lad ban ïakren bad ki nongpynmih kot bad ki seng kiba wan ïashim bynta.
Na ka liang u ma Wailadmiki Shylla haba ai jingkren ula pynpaw ïa ka jingdonkam ban ïai minot haka pule kot khamtam ha kum kane ka juk jong ka jingïaleh. Ula kdew ïa ka jingdonkam jong ka Digital Learning Centre kaba la plie ha District Library bad kane kan ailad ïa ki samla pule bad ïa ki paidbah nongshong shnong ban ïoh jinghikai katkum ka juh. Ula kyntu ïa ki samla pule ba kin pynïar shuh shuh ïa ki jingtip jong ki ha ki subject bapher bapher.
Ula ai ka jingïaroh ïa u Deputy Commissioner u Abhinav Kumar Singh uba la kyrshan borbah ïa kane ka prokram na ka bynta ki samla hapoh ka Distrik. Ula ong ka jingdon kum kane ka prokram Book Fair kan pynshlur shuh shuh ïa ki samla ban pule kot ban ïoh jingtip kham shalor.
U Abhinav Kumar Singh uba dei u Deputy Commissioner ula pynsngew ïaka jingdonkam jong ka 1st West Jaiñtia Hills Book Fair, ïa kaba la pynlong haka sien ba nyngkong hapoh ka District. U la pyntip ruh ki jinghikai lyngba ka digital kin ïarap shibun eh ïa samla pule. Ula ai khublei ruh ïa ki nongshim bynta haka jingpyni dur bad ki jingdro dur bad kane ka pynpaw ïa ka jingriewspah jong ka District haka riti dustur.
Ïa kane ka Book Fair la pynlong da ka ophis jong u Deputy Commissioner, West Jaiñtia Hills District ha ryngkat ka jingïatreilang bad ka Owl Library Initiative hapoh ka Kyrshan Foundation, kaba la bei tyngka lyngba ka CM Catalytic Fund- “Ka Jingrakhe ïa ka thoh ka tar, ka kolshor bad ka imlang sahlang”
Kane ka Book Fair kan sdang naduh mynta ka sngi 6 tarik bad ka 7 tarik u Lber, 2026 bad la don bun tylli ki kot bala wan die ha kane ka sngi naduh ki trai shnong, ki katto katne na Assam, ki nongpynmih kot bad ki seng kiba kynthup ka Ri-Khasi, Books and Brews ka North Eastern Social Research Centre, ka Saura Mandala Foundation, ka Admission Online bad ka ALS Coaching Centre. Na ka liang ki stall kiba wan shim bynta kila ai jinghikai shaphang ki kot pule na ka bynta ki samla pule.
