Ka Dorbar Niam ka Seiñraij Jowai kaba long ka tnad treikam ba kongsan jong ki khun ka Niamtre ban pynneh ïa ki kam ñiam hapoh ka Raij Jowai, mynta ka sngi 26 tarik u Jymmang kala pynlong ïaka ‘Dorbar ki Kñi bad Ka Kchu Ka Siang’ ha Madan Kñia Pyrthai, Dulong Pohhali.
U Shape Paswet uba dei u Kñi ka Kur Paswet ula kren halor ka phang kaba ong “I Chwar U Pa Pyrkhat bad Pynskem Ia Ki Kñi Phra Kur Phra Kmai”, ula ïathuh khana kumjuh shaphang ka jingseng ïa ka Shnong Jowai.
Shuh shuh ula batai halor ka jingsdang ïa ka lehñiam Behdieñkhlam bad kumno ki Kur jong ki, kin bhah haki kam ñiam kam rukom hapoh ka Raij Jowai.
U General Secretary ka Seiñraij, u Arwotki Sumer ula kren halor ka phang “I Dor I Pyrtuid Niamtre” bad ula batai ïa ka jinglong kyntang ka Niamtre hapoh ka jaitbynriew. Ula pynsngew ruh kumno ka Niamtre kala pynbeit ban kam dei ban ai jait sha u shynrang.
Na ka liang u President ka Seiñraij Jowai, u Hercules Toi ula kren halor ka phang “Ki Kñi Lyngba Ki Chnong Ki Raij bad Ka Niam Ka Rukom” da kaba ïathuh ruh ïa ka kamram jong ki Kñi ban pyndep ïa ka ñiam haki ïing ki sem, ki shnong bad ha ki Raij.
Ha kane ka Dorbar la wan ban sakhi bad pynkup burom kumjuh ïa ki Dolloi na kylleng ki Elaka ka Ri-loom Jaiñtia kiba kynthup ïa u Dolloi na Elaka Nangbah, Elaka Raliang, Elaka Shangpung, Elaka Mynso, Elaka Darrang, Elaka Nartiang, Elaka Nongtalang bad Elaka Nongjngi.
Kumjuh ruh la pynkup burom ïa ki Kñi ki Phra Kur Phra Kmai kiba don hapoh ka Raij Jowai bad kiba don bynta ha ki kam ñiam hapoh ka Raij.
Ïa ka Dorbar la pynïaid da u Pator ka Elaka Jowai, u Raymond Nartiang bad u S. Siangbood u Langdoh ka Raij Jowai ula ai ki kyntien pdiang sngewbha, katba na ka liang u Dolloi ka Elaka Jowai, u ma Puramon Kynjing ula ai ki kyntien Nguh Blai.
