Ka Shad Behdieñkhlam jong ka Seiñ Raij Jowai kaba ju long manla u snem hapoh ki ‘Saw sngi Lai miet’ kala sdang naduh mynta ka sngi ‘Pynsiñ’ jong ka 6 tarik bad yn pynkut ia ka ha ka sngi ‘Muchai’ jong ka 9 tarik u Naitung 2023 da kaba pynlong ia ka jingnoh Rot ha Syiem Aitnar.
Mynta ka sngi ‘Pynsin’ 6 tarik kala don ka jingpyndep ia ki ñiam ki rukom bapher bapher naduh ka por 5 baje mynstep kum ka ‘Khrong Khoo’, ka ‘Li dain Khnong’, ka ‘E Bam E Dih ia ki Sangia’ bad kiwei.
Katba ha ka por janmiet ki khun ka Chilliang Raij (Khon Raij) kila leit rah na khlaw ïa ka “Symbood Khnong” ha ryngkat ka shad ka kmen, ka pud ka tem ha shi lynter lynti haduh ban da poi ha ‘Tre Kjat Loomsooïung’ New Hill Jowai.
Ha ka por miet pat kan don sa ka ‘Bam Tyngkong’ ha ïing Langdoh bad ka ‘Kdoh Sarang’ da u Sangot Paswet bad Harna Muid.
