Ka Khasi Students’ Union East Jaintia Hills District Unit ha ka 19/01/2023, kala ioh ban pynthymmai iaki nongkitkam jong ka KSU Huroi Unit. Ha kaba la pyntian smai ia ki nongkitkam da u samla Ostranic Marbaniang Organising Secretary KSU Sengkmie ha ryngkat ka jingiadonlang u samla Shiningstar Kharbihkhiew Asst Education Secretary KSU Sengkmie bad ki nongialam jong ka KSU East Jaintia Hills District Unit naduh u General Secretary samla Kwillness Suchiang, Organising Secretary Samla Deiniwan Lyngdoh, Finance Secretary Samla Shaniahskhem Dkhar, Asst Finance Samla Cherity Suja bad kiwei kiwei ki nongialam na ka District bad Circle.
Ia ka jingialang la pyniaid da u samla Kwillness Suchiang General secretary KSU East Jaintia Hills district unit bad la ioh iaka jingkren pdiang na u samla Tarlin Gadew. La ioh ka jngkren na u President barim ka Seng u Samla Poly Pohlong uba la iathuh ha ka jingialam jong u ki la khang shipor ia ka jingpyntrei ia ka border fencing namar ba ki bor District jong ka East Jaintia ki khlem pat dep siew lut ia bai jaka sha ki trai jaka, ha kata ka por ka la jur ka jingiakynad hapdeng ki ar liang mamla khadduh ki trai jaka ki la ioh tang 40% ka compensation.
La ioh ka jingkren na u Rangbah Shnong ka Huroi, uba la ia ki kyntien sneng bad kyntu ia ki samla jong ka KSU ban iai trei lang bad ka Dorbar Shnong. La ioh ka jingkren lyngkot na Asst Finance KSU EJHDU samla Cherity Suja bad na I Samla Wanlam Nongsiej Vice President KSU Delhi La ioh ruh ka jingkren kyntu kynpham na u samla Shiningstar Kharbihkhiew uba la kyntu ia ki nongkitkam jong ka Huroi ban bud ryngtih ia ka rukom trei kam ka seng katkum ki nongrim ki mat treikam bad katkum ka Constitution jong ka seng bad u la kyntu ruh ia ki da kaba ong “haba long u dkhot ba pura jong ka seng phi dei ban tip ia ki nongrim treikam jong ka seng”. Na ka liang jong u samla Ostranic Marbaniang u la batai bniah ia ka riti treikam jong ka seng ha kaba kum ki samla kidei ban skhem ka Nongrim ban long kum ki nongialam khnang ba ki lah ban pyntyllun iaki kam jong ka seng ha kaba iadei ban shakri ia ka jaidbynriew. U la pynkynmaw ia ki mat ki nongrim jong ka KSU kaba ka ieng skhem kaba ieng bad iai neh haduh mynta mynne. Kita ki long ki lai tylli kaba nyngkong ban iada, ba ar ban pynneh pynsah bad kaba lai ka long ban kyntiew. U la bynrap ba dei ban iada na u nongwei nongar ba wan kam trai khlieh bad iuhroit ia ka hok longtrai jong ngi ki rit paid. Ban pyneh pynsah ia ka riti bad ka jinglong kyrpang jong ngi ka jaitbynriew khasi hangne ha sla pyrthei. ka seng hi ka pyrshang ban kyntiew ia ki samla jong ka jaitbynriew ha la ki jong ki sap ki phong kaba ki don.
Ula pynkynmaw ruh ia ki jingeh ba ka KSU ka ia kynduh ha ka por ba iakhih pyrshah ia ka CAA ha kaba ka jaitbynriew ka la duh noh ia uwei u dkhot ba shit rhem ha Ichamati ha u snem 2020. Kane ka pynsat ia ki samla jong ka paid ka bri u hynniewtrep. Ha u snem 2021 ki bor pulit ki la dkhat jubor ia ka jingim u Bah Cheristerfield Thangkiew. Ha u snem 2022 ka jingjia ha shnong Mukroh ka jingshah dkhat jubor ki paradoh parasnam ha ki kuli jong ki pulit Assam. Kum ka jaitbynriew ngi mad ka jingleh beiñ naduh ki mynder ri na ki bor sorkar bad na ki pulit Assam na ka por sha ka por bad ngim tip ha u snem 2023 kan jia aiu ia ka jaitbynriew jong ngi. U ngeit skhem ba ka jingdon ki samla ki ban iakhih na ka por sha ka por ban ieng na ka bynta ka dawbah bad ka hok jong ka jaitbynriew bad ula bynrap da kaba ong ba ka jaitbynriew kaba khih ka dei ka jaitbynriew kaba im. La ioh ka jingkren lyngkot na u President ba thymmai ka KSU Huroi unit u samla Wanlam Lamin Gadew.
