Ka Khasi Students’ Union (KSU) Sengkmie kala wan ban pynskhem ia ki nongkitkam ba pura jong ka KSU West Jaiñtia Hills District ha ka jingialang kaba la pynlong ha Samanlang Pastoral Center Bishop House, Lumbih Syntu Mihmyntdu Jowai hapoh ka jingpynïaid u samla Dakishanlang Malang Asst. Organizing Secretary KSU Sengkmie.
Ha kane ka jingialang pynskhem nongkitkam ka KSU la iadonlang u President ka Synjuk ki Rangbah Shnong Ri Jaiñtia ma Armyius Lypon, u riew rangbah na thaiñ War Jaiñtia ma Kolmen Pohshna, u Dolloi ka Elaka Darang ma Pyrwa Lymba bad kiwei de ki nongïalam sengbhalang jong ka Ri-Lum Jaiñtia kiba kynthup ïa ka Jaiñtia Student Union (JSU) bad Federation of Khasi Jaiñtia and Garo People (FKJGP).
U bah Lambokstar Well Marngar President KSU Sengkmie ula wan ban pynbam smai ia kine ki nongïalam ka KSU West Jaiñtia Hills District kiba kynthup ïa u President samla Laitphar Syngkrem, Vice President samla Chanbor War, General Secretary samla Leningrad Tariang, Asst. General Secretary samla Balawantei Suchiang, samla Phraki Hawni Thubru, Education Secretary samla Tyngshaiñ Krem, Organising Secretary Ewanmi Phawa, Publicity Secretary samla Juhhi Tariang, Sports Secretary samla Michel Platini Mukhim, Office Secretary samla Leonard Dhar bad samla Eugine Hinge, Finance Secretary samla Phrangki Papang, Environment & Cultural Secretary samla Lob Stevenson Khonglah, bad la jied ruh 6 ngut ki samla rangbah kiba long kum ki dkhot ka Executive Committee.
Haba ai jingkren u bah Lambokstar ula pynsgew ba ka seng KSU ka la kynjoh sha ka jingdap ba 44 snem ha kane ka 20 tarik mynta u bnai, hynrei ka seng ka sngew kitram pat namat ba dang don shibun ki kam ba ki samla kin hap ban ïakhun na ka bynta ka ri bad ka jaitbynriew.
Ula pynkymmaw ruh ba ïa ka Inner Line Permit (ILP) la sdang ban dawa naduh u snem 1979. Kumta ka por kala khot ïa ki khun samla ban khlaiñ ka jingmut jingpyrkhat bad kiba don ka mynsiem ieit ri, ban wanrah ka jingkylla ha ka bha ka miat jong ka imlang ka sahlang.
La pynphuh pynphieng shuh shuh ïa kane ka sngi da ki jingshad tynrai da ki khun samla na ka shnong Shangpung bad Wahiajer.