Ka Rotary Club Jowai (RCJ) RID3240 ha kane ka sngi Saitjaiñ 6 tarik u Naitung, 2024 kala ïoh ban pynskem ïa ki nongkitkam ba thymmai jong ka na ka bynta u snem 2024-2025, kaba la tip kum ka “29th Installation Ceremony” ha ka jingïalang bala pynlong ha Orchid Inn Resort Thadlaskeiñ Lake, West Jaiñtia Hills District.
Ha kane ka sngi la wan ban pynskem ïa ki nongkitkam ka Rotary Club Jowai da u kongsan jong kane ka sngi u Rtn. Manas Choudhary, ïa ka jingïalang la pynïaid da u President ba thymmai ka RCJ u Rtn. R.E. Laloo, ha ka jingdonlang ki dkhot ka Club bad kiwei de ki para dkhot jong ka Rotary Club na Shillong.
Ha kane ka sngi hashwa ban sdang ka prokram la don ka jingrwai ïa ka National Anthem bad ka jingpule ïa ka Pledge bala lam khmat da ka Rtn. Easter Flora Gatphoh. La pynrung dkhot thymmai ïa ki arngut hapoh ka Rotary Club of Jowai kata ïa u Rtn. Stanly Roy Mulieh bad u Rtn. Ashesh Kumar Singh da kaba kyntu ba kin ïadon byntalang ban trei ïa ki kam babha jong ka Rotary Club Jowai.
U Rtn. Manas Choudhary haba ai jingkren kum u kongsan ula ong kaba donkam eh kum ki dkhot ka Rotary Club Jowai ki dei ban don ka mynsiem jingïaieit bad ban ïarap na ka bynta kiwei, namar ka Rotary kadei kawei na ki kynhun treimon sngewbha ha ka Ri bad ha ka pyrthei hi baroh kawei.
Ha ka juh ka por ula kyntu ïa ki nongkitkam ba thymmai jong ka Rotary Club of Jowai hapoh ka jingïalam Rtn. Rudolf Eustace Laloo kum u President ba kin buh ïa kawei na ki projek treikam kaba heh ha khmat bad kane ka projek wat la ka long haka jinglut kaba heh ruh hynrei kan long pat kaba lah ban pynmih jingmyntoi ha ki sngi ban wan.
Ula ai khublei ruh ïa ki nongkitkam jong ka Rotary Club Jowai kiba la synñiang ïa ki kam babha da ki bun tylli ki snem tad haduh mynta kiba dang ïaibteng ïa ka kam, kumta ula ong kaba donkam mynta ban pynbun shuh shuh ïa ki dkhot hapoh ka Club khnang ba yn lah ban trei khambha ïa ki kam hapoh ka imlang ka sahlang.
Ki nongkit kam ka Rotary Club Jowai na ka bynta u snem 2024-2025 la jied President ïa u Rtn. Rudolf Eustace Laloo, Vice President Rtn. S. Kmenlang Lato, Secretary Rtn. Montri Passah, Treasurer Rtn. James Monroe Pohsngap, nalor kiwei de ki nongkitkam jong ka Club.
