Ka Hills Farmer Union (HFU), West Jaiñtia Hills District ka la pynthymmai ïa ki nongkitkam jong ka seng ha kane ka 21 April 2025 ha ka jingïalang ba la pynlong ha Highwind Thadlaskeiñ, Mukhla, West Jaiñtia Hills District.
Ha kane ka sngi la pynïaid ïa ka jingïalang da u President jong ka HFU -WJHD u bah Mutshwa Thabah uba la ai ruh ïa ki kyntien maitphang bad ki jingbatai ïa ki rukom treikam jong ka seng. La wan ban ïa shim bynta da baroh ki nongkitkam jong ki Unit ka Hill Farmer’s Union ki ba don ha ki 3 tylli ki Block hapoh ka West Jaiñtia Hills District.
Hadien ba la ïatai sani (Discussion) ïa ki kyndon bad ki rukom trei kam jong ka seng la jied bad pynthymmai ïa ki nongkitkam jong ka HFU West Jaintia Hills District Unit kiba long kumne 1. Mr Mutshwa Thabah (President) 2. Mr Mosses Suting (V-President) 3. Mr Kmenlang Suting (Secretary) 4. Mr Romeius Timung (Asst Secretary) 5. Mr Lenis Suja (Tresurer) 6. Mr Supplyme Sari (Organizing Secretary) 7. Chanbor Rymbai & Mr Janra Sari (Adviser) bad ki Executive members kumba 20 ngut na ki Unit bapher bapher jong ka HFU ki ba don hapoh West Jaiñtia Hills District.
Ïa ki nongkitkam ba thymmai la pynskem da ki dkhot jong ka HFU Central Executive member ki ba kynthup ïa u bah Rymphai Kharkongor bad u bah Commingstar Kharumlong ki ba la ai ruh ïa ki kyntien ai mynsiem, ki kyntien sneng bad ki kyntien pynshlur ïa baroh ki nongkitkam jong ka seng.
La pynkut ïa ka jingïalang da ki kyntien ai khublei na u President jong ka HFU West Jaiñtia Hills District u bah Mutshwa Thabah.