Ka District Magistrate jong ka East Khasi Hills District i kong R.M. Kurbah, IAS ila pyntip ba la pyntreikam ia ka kyndon 126 of the Representation of the People Act, 1951 naduh ka por 4 baje janmiet mynta ka 19 tarik Rymphang 2025 da kaba pyntreikam ia ka kynta ba jar jar ne ka “Campaign Silence Period”.
Kane ka aiñ kan treikam ha ki 48 kynta naduh ka 4 baje janmiet mynta ka sngi haduh ka por ban kut ka jingiathep vote ha ka 21 tarik mynta u bnai.
Kumta ha kaba iadei bad kane la khang ia kino kino ki jait jingialap elekshon, ki jingialang paidbah, ka jingiaid proseshon, bad kiwei kiwei. La khang ruh ia ka jingpynmih ia ki jingpynbna elekshon lyngba ki Television, ki Print bad Electornic media bad kiwei ki rukom. La khang ruh ia ka jingpyndonkam ia ki kor pynsawa ba jam (Loudspeakers) hapoh kine ki 48 kynta.
Ia kane ka hokum la ai muhor mynta ka sngi da ka District Magistrate katkum ka jingpynkup bor ia ka lyngba ka kyndon 163 BNSS.