U District Magistrate jong ka West Jaintia Hills District u bah B.S. Sohliya, IAS, ula pyntip ba kum shi bynta ban bud ryntih ia ki aiñ bad kyndon jong ka Election Commission jong ka ri India ne ki SOP na ka bynta ki 72 kynta haduh ka sngi niew vote ula hukum ban pyrkhing bha ia ka iaid ka ieng jong ki kali na kawei ka jylla sha kawei, na ka wei ka District sha kawei bad ruh ha ki bynta khappud (International Border).
Ka jingpyrkhing ka long shi bynta ban teh lakam ia ka jingthmu jong ki katto katne ki briew kiba thmu ban rah pisa be-aiñ ha kum kine ki por ba don ka elekshon ne ka jingpynthut ia ka shongsuk shongshngaiñ. Dangshen ha kine ki por ba la dep kala don kum kane ka jingjia ha ki bynta khappud ka Meghalaya bad Assam, kumta na ka liang u District Magistrate ula hukum ba dei ban peit ngor bha halor kane.
Kumta na ka liang jong u DM ula pynjari noh da ka kyndon aiñ 144 CrPC kaba la khang ia ka jingiaid laitlan jong ki kali ki riew shimet bad ki kali kamai ban rung na kawei ka jylla sha kawei pat, na kawei ka District sha kawei pat kumjuh ruh ha ki thaiñ khappud. La pyrkhing bha ruh ia ka jingiaid jong baroh ki jait kali bad ki briew ha ki bynta khappud bad la khang ruh ia ka jingiaid jong ki briew na kawei ka District sha kawei pat lymda dei na ka kam thep vote.
Ia kane ka hukum la pynmih bad pyntreikam noh naduh mynta ka janmiet jong ka 24 tarik u Rymphang 2023 naduh ka por 4:00 PM bad kane ka hukum kan neh haduh ka 27 tarik mynta hi u bnai.