Ka ophis jong ka District School Education Officer, West Jaiñtia Hills mynta ka sngi 5 tarik u Nailur kala rakhe ïaka sngi kyrpang ki nonghikai ne ka ‘63rd Teachers’ Day’ ha District Library Auditorium, Mynthong, Jowai.
Ha kane ka sngi u ma Lahkmen Rymbui, MLA 7-Amlarem uba dei ruh u Chief Adviser jong ka sorkar jylla ula long kum u kongsan bad ka Additional Deputy Commissioner kong B. Blah kala long kum ka symbud kongsan.
Haba ai jingkren u ma Lahkmen Rymbui ula ai ka jingïaroh ïa ki nonghikai kiba len ïalade ban saiñdur ïa ka pule ka puthi jong ki khynnah skul, ula ong ka jingai jinghikai ïa ki khynnah skul yn tang ha ka jingstad hynrei ban saiñdur kumjuh ïa ki ban don ka jingkitkhlieh kum ki nongshong shnong.
Ula pynsngew halor ka jingtrei shitom ki nonghikai ban pynrung ha ki jingmut jingpyrkhat jong ki khynnah skul ban long kiba laitluid, kiba tip sngi bad kiba bha haka jinglong jingim.
Shuh shuh ula ong ban pynjanai ïaka rukom ai jinghikai na ka liang ka sorkar kala pynkhreh ïaki jingai training bapher bapher ïa ki nonghikai kynthup ïa ka online platforms kumka NISHTHA bad kiwei.
Ula kyntu ïa ki nonghikai ba kin bteng ban pynthymmai ïa ki jingai jingtip sha ki khynnah skul katkum ka juk ba mynta. Da kaba khot lang ïa baroh ban don ka jingïatreilang naduh ki nonghikai, ki kmie ki kpa bad ka shnong ka thaw khnang ban pynkiew ïa ka pule ka puthi hapoh ka jylla. Ula kyntu kumjuh ki khynnah skul ba kin bteng ïa ka jingpule haduh ban da poi sha ka thong ka jingjop.
Ha kane ka sngi kyrpang ki Nonghikai la sam ïa ki khusnam District Award sha ki nonghikai kiba kynthup ïa ka Diamond Paswet, Assistant Lecturer, Government Boys’ Higher. Secondary School (Hr. Sec & Sec Level). U Emperor Gassah, Head Master, Trangblang Govt U.P School, Trangblang (U.P Level). U Pratap Singh Khonglah, Head Teacher, SR Manner Memo. Government Lower Primary School, Sohkha (L.P Level). U Carefully Gassah, Scout Master, Assistant Scoutmaster, Jowai Open Scout Troop bad ka Grecorisa Sana, Guide Captain, Lissi Pearl Guide Company.
La pynphuh pynphieng shuh shuh ïa kane ka sngi da ka jingrwai, ki jingshad bad kiwei de ki jingpynbyrnia ïa ki nonghikai.
