Ki bor pynïaid ka Don Bosco Secondary School, Mookymphad-Mihmyntdu kum shibynta ka jinglehkmen ïa ka 1st Annual Day-Indian Classical Dance 2023 ha ka 2 tarik February ki la pynlong ka prokram kyrpang ha ryngkat ka jingiadonlang u bah Terence Sawian kum u kongsan, ka Kong Tina Lakiang kum ka Symbud kongsan nalor ki Sister, ki nonghikai bad ki kmie ki kpa jong ki khynnah.
Ka Sister Maria Joseph kum ban maitphang ka la ai ki kyntien duwai bad ka Agnes Lapasam ka la pashat ki kyntien pdiang burom katba kiwei kiba la kren ai mynsien ïa ki khynnah kumjuh ïa ki bor pynïaid ka skul ki kynthup ïa ka Dr. Snigdha, ka Maria Dominica bad ka Sister Sheela Thomas, Headmistress Don Bosco Secondary School, Mihmyntdu.
Ka kong Tina Lakiang haba ai jingkren ka pynpaw ka jingsngewnguh ia ki Sister kiba la shimkhia ban trei na ka bynta ban kyntiew ia ka pule puthi jong ki khynnah bad ka kitbok kitrwiang ruh ba ha ki por ki ban sa wan ki don shuh shibun ki khynnah ki ban wan shah hikai na ka bynta kine ki rukom shad ba bna nam ka ri India.
ïa kane ka prokram ai jinghikai shaphang ka Indian Classical Dance la peit bad pynïaid da ka Roshni ba na ka Jylla Bhopal bad ha ki ar bnai jong kane ka prokram ka la trei shitom kat haduh ba ki khynnah ki la lah ban pyni ïa ka sap ka phong jong ki kumno ban shad Kathak bad Bharatnatyam.
U bah Terence Sawian haba ai jingkren kum u kongsan, u ong ka sur bad ka jingshad ki dei ki dawai ha ka jingim jong ngi ki briew bad ki don ka bor ban ktah bad ktik ïa ka pyrkhat pyrdaiñ bad ka jingsngew jong ki briew kumta ka long kaba donkam ban pynrung ha ka pyrkhat pyrdaiñ ki khynnah skul ïa ka jinglong kyrpang jong kine ki ar tylli.
Ha kane ka sngi la aiti ruh ïa ki Certificate sha baroh ki khynnah ba shah hikai.
