Ka Rotary Club Jowai (RCJ) ha kane ka 18 tarik mynta u bnai kala pynlong ïa ka jingïakynduh lang ha New Hills Social Club Hall, Jowai kum shi bynta ban pynkut ïa ka jinglehkmen dap 25 snem ka Rotary Club Jowai.
Ha kane ka sngi ki dkhot ka seng kiba la wan ban ïadonlang ki kynthup ïa u kongsan Rtn. Manas Choudhury, Past District Governor RID 3240, ha ryngkat u Rtn. Kishan Tibrewalla (MPHF) Assistant Governor Zone-X RID 3240 bad u Rtn. Dr K.S.Elangbam, District Secretary Foundation RID 3240.
Ïa ka jingïalang la pynïaid da u Rtn. Montri Passah, (MPHF) President Rotary Club Jowai la ïoh ka jingkren ha kaba ïadei bad ka jingrakhe (Silver Jubilee) da u Rtn. S.K.Lato, Chairman Silver Jubilee Celebration bad ïa ki kyntien pdiang burom la ai da u Rtn. J.M. Pohsngap (PHF).
Ka Rtn. E.F.Gatphooh (MPHF) Charter President of Rotary Club Jowai haba kren kala pynsngew ïa ki kam ba bha jong ka Rotary Club Jowai kaba la synñiang kum ka kynhun treimon sngewbha sha ka imlang ka sahlang naduh ka snem 1995 ter ter haduh ka snem 2021.
Ha kane ka sngi la pyllait ruh ïa ka Souvenir Silver Jubilee Celebration da u kongsan Rt. Manas Choudhury bad la pynkup burom kyrpang ïa ka Rtn. E.F. Gatphooh (MPHF) Charter President bad u Rtn. D.F.Majaw (PHF) Director Club Service kiba long ki rishot bah ka Rotary Club Jowai naduh bala seng ïa ka.
Na ka liang u Rtn. Kishan Tibrewalla (MPHF) Assistant Governor Zone-X RID 3240 bad u Rtn. Dr K.S.Elangbam, District Secretary Foundation RID 3240 kila kitbok kitrwiang ïa ki dkhot ka Rotary Club Jowai ha ka jingïaid lynti jong ki na ka bynta ka jingmyntoi ki nongshong shnong hapoh ka Ri-Lum Jaiñtia.
U kongsan Rtn. Manas Choudhury (Major Donor) Past District Governor RID 3240 ula ong ba ka jinglah jong ka Rotary Club Jowai ban pyndep ïa ka jingïaid lynti kaba 25 tylli ki snem kam dei kaba suk, hynrei kine baroh ki dei da ka jingtrei shitom jong ki nongkitkam naduh ka por ka seng ïa ka haduh mynta.
Ula ai mynsiem kumjuh ïa ki dkhot ka Rotary Club Jowai ba kin nang ïaid shaphrang ha ka jingshakri katkum ka juk ba mynta tad haduh ba ka Club kan ïoh jam sha u mawmer ba 50 snem da ka jingïadei jingmut lang jong ki dkhot.
La pynphuh pynphieng ïa kane ka sngi lehkmen Silver Jubilee ka Rotary Club Jowai da ki jingrwai bad ki jingshad ba la shim bynta da ki Rotaractors bad ki khun samla jong ka Seiñraij Jowai. Katba ïa ki kyntien ai khublei la ïoh na u Rtn. Dr. D.I. Kjam.
