Ka Balang Unitarian ha Jowai kaba la ioh ban rakhe ia ka jingdap 137 snem (137 Anniversary) jong ka Balang bad ka theme jong ka jingrakhe ka long “Lynti ka Niam U Blei ba pynhun Mynsiem” ka la sdang ia ka jingrakhe naduh kine ki taiew ba la dep bad kut noh mynta ka sngi 18.09.2024.
Mynta ka sngi 18 tarik September 2024 kaba long ka sngi kyrpang la sdang ia ka jingrakhe naduh ka por 8:30 mynstep da kaba pyndeng syntiew ia u Mot jong u nongseng ba Rangbah ka Balang u Babu Hajom Kissor Singh, la pynher ruh ia ka Lama ka Senglang Unitarian. Hadien kane bud sa ka jingiaseng duwai haka por 8:45 mynstep.
Katba ha ka jingiaseng kaba la long ha ka por 12:30, la ioh ia ka jingkren na u Kiki Pakma uba long u Moderator uba la tbeh ruh ia ka sharak, lam jingiaseng da u Dawyo Kjam, nongkyntu kynpham da u Homeland Lamar bad nongduwai da u Marki Passah.
Ha kane ka jingiaseng mynsngi la ioh iaka pule Pledge, la pynlip ia ka sharak bad jingkyrkhu pynwai na u Moderator. Ha ka por janmiet pat la pynhiar ia ka Lama ka Senglang Unitarian bad hadien kane pat don sa ka jingiaid Procession da kaba rah lang bad ki Dongmusa kaba la pynkhreh da ka seng Samla bad hadien ka Procession yn don ka jingiaseng janmiet.
