![](https://i0.wp.com/yutipnews.com/wp-content/uploads/2022/12/WhatsApp-Image-2022-12-30-at-6.36.30-PM-1-1024x576.jpeg?resize=640%2C360)
Mynta ka sngi ïa ka lyngkhuh sngi ïap ba 160 jong u Khlawait ka Ri 12-Dolloi u Kiang Nangbah, la rakhe pyndon burom hapdeng ka jingphuh jingphieng bad ïa kane la rakhe ha Kiang Nangbah Memorial Park Madiah Kmai Blai harud jong ka Wah Myntdu (Syntu Ksiar) ka jaka kaba la buh ban pynsahnam ïa une u Khlawait ka jait bynriew. Ia kane ka prokram la pynlong da ka Kiang Nangbah Iasiat Khnam Memorial Society (KNIKMS), Jowai.
Ïa ka jingïalang la pynïaid da u Wh P. Toi President ka seng ha ryngkat ka jingdonlang u kongsan u MLA ka 2-Jowai Constituency u ma Wailadmiki Shylla, u ma Puramon Kynjing Dolloi ka Elaka Jowai, u ma Saron Paswet MDC 19-Jowai South Constituency kiwei de ki riew rangbah bad ki paidbah kiba la wan sakhi lang ïa kane ka sngi kynmaw burom ïa ka sngi kynmaw burom ïa u Kiang Nangbah.
![](https://i0.wp.com/yutipnews.com/wp-content/uploads/2022/12/WhatsApp-Image-2022-12-30-at-6.36.31-PM-1024x576.jpeg?resize=640%2C360)
Na ka liang u ma Wailadmiki Shylla ha ba kren kum u kongsan ula buh ka jingkyntu lang ïa baroh da kaba ong kum ka jaitbynriew ba mynta ka donkam shisha ban pynneh pynsah ïa ka riti ka dustur jong ki longshwa manshwa naduh ka riam ka beit, ka ktien ka thylliej, ka akor ka burom nalor kiwei de ki jinglong tynrai.
Ula ai ka jingïaroh ïa ka KNIKMS kaba la shim ka jingkitkhleh ban pynmiat pynbha ïa kane ka jaka ba don u mot jong u Kiang Nangbah bad kumjuh ïa ka madan kaba khring ïa ki nongwan jngoh kai, ula pynsngew kum ka jaitbynriew dei ban pynduh pyndam noh ïa ka jinglong bishni iwei ïa iwei khnang ba yn lah ban wanrah ka jingïatylli lang kawei.
![](https://i0.wp.com/yutipnews.com/wp-content/uploads/2022/12/WhatsApp-Image-2022-12-30-at-6.36.30-PM-1024x576.jpeg?resize=640%2C360)
Ula ong lyngba ka jingïatylli ‘ngin da lah ban pynsngew ïa kawei ka sur naduh ki nongïalam bad ki paidbah’ khnang ba kino kino ki jingdawa na ka bynta ka Ri-Lum Jaiñtia kin long kiba jop da kaba ai nuksa ban dawa wanrah ïa ki jaka pule kum ki skulbah (University).
Ula ong kum u nongmihkhmat ka 2-Jowai Constituency ula pyrshang ban wanrah ïa ki kam pynroi hapoh ka shnong Jowai hi baroh kawei, wat ïa u Surok uba hiar shaduh Syntu Ksiar sa katto katne sngi ka kam kan sa sdang noh ka jingtreikam lyngba ka jingiarap pisa jong ka World Bank kaba kot haduh 28 klur ban pynshna ia baroh ki surok ha Jowai kaba kynthup lang ia utei u surok Syntu Ksiar.
![](https://i0.wp.com/yutipnews.com/wp-content/uploads/2022/12/WhatsApp-Image-2022-12-30-at-6.36.29-PM-2-1024x576.jpeg?resize=640%2C360)
Ha kane ka sngi u kongsan u la leit ban buh syntiew ha trai jong u mot u Kiang Nangbah bad pynher ïa ka lama jong ka Kiang Nangbah Iasiat Khnam Memorial Society. Kiwei de ki seng bhalang jong ka Ri-lum Jaiñtia kiba kynthup naduh ka JSU, FKJGP. MPUF, JYF, JSM kila leit ban buh syntiew, katba ha ka por janmiet la pynlong ïa ka jingsiat khnam ha katei ka madan (Madiah Kmai Blai).
Na ka liang u kongsan ula pyllait paidbah ruh ia ka kot rit kaba la thoh shaphang u Kiang Nangbah da u ma R.Q Laloo bad la pynphuh pynphieng shuh shuh ïa kane ka sngi da ki jinglehkai drama bad ki jingrwai kyrpang. Ha ka juh ka por la sam ruh ïa ki khusnam sha ki nongjop ha ka jingïasiat khnam ha ki kyrdan bapher bapher bad kumjuh ha ka jingïakop dro dur ba la pynïaid da ka KNIKMS.
![](https://i0.wp.com/yutipnews.com/wp-content/uploads/2022/12/WhatsApp-Image-2022-12-30-at-6.36.29-PM-1-1024x576.jpeg?resize=640%2C360)
Mynta hi ka sngi ha ka por 10 waje mynstep la don sa kawei pat ka jingrakhe leh burom ïa kane ka sngi hapdeng ka jingiphuh iphieng kaba la pynlong ha madan Mynkoi Pyrdi Iongpiah, Jowai ba la pynkhreh da ka Seiñ Raij Jowai ha ryngkat ki prokram bapher bapher.
Ha kaba ka Deputy Commissioner ka East Khasi Hills ka kong Isawaka Laloo (IAS) kala long kum ka kongsan ha ryngkat ka jingdonlang u Prof. L.R Gassah uba la ai jingkren shaphang ka History jong ka Ri-Lum Jaiñtia, u President ka Seiñraij ma O.R Shallam, ma Lammat-oo Laloo Secretary Land SRJ nalor kiwei de.
![](https://i0.wp.com/yutipnews.com/wp-content/uploads/2022/12/WhatsApp-Image-2022-12-30-at-6.36.32-PM-1024x576.jpeg?resize=640%2C360)