–10 lak tyngka kular u MP ban ïarap sha ka KNIKMS-
Ïa ka lyngkhuh sngi ïap ba 162 snem jong u Khlawait ka Ri Jaiñtia u Woh Kiang Nangbah, la rakhe pyndon burom mynta ka lah sngi U Blei ha Kiang Nangbah Memorial Park Madiah Kmai Blai, harud jong ka Wah Syntu Ksiar, ïa kaba la pynlong da ka Kiang Nangbah Iasiat Khnam Memorial Society (KNIKMS), Jowai.
Ha kane ka sngi u MP ka Rajya Sabha Dr. Wanweiroy Kharlukhi ula long kum ka kongsan ha ryngkat ka jingdonlang u MDC ma Saron Paswet, u President ka KNIKMS ma C. Najiar, Founder Member, ki nongkitkam ka KNIKMS nalor ki paidbah kiba la wan sakhi lang ïa kane ka sngi kyrpang.
Na ka liang u kongsan Dr. Wanweiroy Kharlukhi haba ai jingkren ula pynsngew khyndiat shaphang ka thma pyrshah ïa ki phareng kaba la mih ha ka por ba ïalam da u Woh Kiang Nangbah uba la lah ban pynïoh ïa ka jinglaitluid ïa ka ri hi baroh kawei.
Ha ka juh ka por ula kular ban pynïoh jingïarap ïa ka Society da kaba pynbna haduh 10 lak tyngka lyngba ka skim MP na ka bynta u snem 2025-26, ula buh ruh ka jingkyntu ïa ka Society ba kan nang bteng ïa kine ki kam ba bha ban pynsah kynmaw ïa u Khla wait ka Ri u Woh Kiang Nangbah bad ban wad khambniah shuh shuh. U ma Kharluki ula pynkymmaw ruh shaphang ka jingïaleh kum u nongïalam sengbhalang ban dawa ïa ki jingmyntoi na ka bynta ka Ri-Lum Jaiñtia.
Ula ong ka jingpoi jong u sha kane ka kyrdan kum u MP ka dei lyngba ka jingkyrshan borbah jong ki nongshnong shnong ka Ri-Lum Jaiñtia, da kaba kular kiba bun hi ki skim jong u shwa ban kut ka samoi kin leit khambun shapoh ka Ri Jaiñtia.
Ha kane ka sngi u Dr. Wanweiroy Kharlukhi ula leit ban buh ruh ïa u syntiew ha trai jong u mot u Kiang Nangbah bad pynher ïa ka lama jong ka Kiang Nangbah Iasiat Khnam Memorial Society. Ha kane ka jingbuh syntiew la ïashim bynta lang da ki seng bhalang bapher bapher kynthup ïa ka BAM-JH.
La pynphuh pynphieng shuh shuh ïa kane ka sngi da ki jingshad pliang, ki jingrwai kyrpang bad kiwei de. Ha ka juh ka por la sam ruh ïa ki khusnam sha ki nongjop ha ka jingïasiat khnam (pyllah) ha ki kyrdan bapher bapher ba la pynïaid da ka KNIKMS.
Mynta hi ka sngi ha ka por 10 waje mynstep la rakhe pyndon burom ïa kane ka lyngkhuh sngi ïap ba 162 jong U Kiang Nangbah la pynlong ha madan Mynkoi Pyrdi Iongpiah, Jowai ba la pynkhreh da ka Seiñ Raij Jowai ha ryngkat ki prokram bapher bapher.
Ha kane ka prokram u Lat ka jylla u C.H. Vijayashankar ula long kum ka kongsan ha ryngkat ka jingdonlang u President ka Sein Raij ma Hercules Toi, General Secretary ma Arwotki Sumer, Dolloi ka Elaka Jowai ma Puramon Kynjing nalor kiwei de.
