Ka West Jaintia Hills District ha ka jingiasnohkti lang ba ka ri India baroh kawei mynta ka sngi kala rakhe ia ka Republic Day kaba 74 ha kylleng ki bynta jong ka District.
Ha nongbah Jowai u Deputy Commissioner ka West Jaintia Hills u bah Batlang S Sohliya, IAS ula pynher ia ka lama lai rong ka ri bad shim ruh ia ka Rashtriya Salute ryngkat ka jingrwai ia ka National Anthem bala ialam da ka skul JNV Mukhla bad ka QC Springside SS, Jowai ha madan Jrisaleiñ. U bah Sohliya ula ai khublei Republic ia baroh kiba la poi sha kane ka jingrakhe bad kumjuh ia baroh ki nongshong shnong jong ka District hi baroh kawei.
Kila don 21 tylli ki kynhun kiba la iashim bynta ha ka parade kiba kynthup ia ka District Police Jowai, ka NCC contingents jong ka Government Girls Higher Secondary Schools, Jowai, ka Meghalaya Bharat Scouts & Guides, Jowai bad 18 tylli ki skul.
Ka skul JNV, Mukhla ka la ioh rah ia ka nam ba nyngkong, ka nam ba-ar la ioh rah da ka Govt. Boys HSS, Jowai bad ka nam ba-lai la rah da ka St. Mary Mazzarello HSS, Jowai.
Ka la don ruh ka jingpyni ia ki Tableau bala iashim bynta da ki 13 tylli ki tnad sorkar, kiba pyni ia ki jingtreikam bapher bapher jong ki lyngba ki skhim bad ki projek. Napdeng kine ka ophis District Sericulture Jowai kala ioh ia ka nam ba nyngkong, ka ophis District Horticulture Officer, Jowai kala ioh ia ka nam ba-ar bad ka ophis District Commerce & Industries Centre, Jowai kala ioh ia ka nam ba-lai.
Ha kane ka sngi kila don ruh ki jingpynbyrngia kum ki shad, ki rwai ba la la iashim bynta da ki dong bad shnong bapher bapher hapoh ka nongbah Jowai.
Kala don ruh ka jingleit sam ia ki jingbam bad ki jingai sngewbha sha ki jaka ri Khunswet da ki tnat sorkar bapher bapher bad ruh da ki kynhun seng.
Ha ka por janmiet ka don ruh ka jingialehkai Football Final kaba iakhun hapdeng ka Demthring SC pyrshah ia ka Sabah Muswang SC ha Kiang Nangbah Stadium, Ladthalaboh.