Ka ophis District Social Welfare Officer ha ryngkat ka jingïatreilang bad ka District Sankalp Hub for Empowerment of Women (DHEW), West Jaiñtia Hills District, Jowai ki la rakhe ïa ka International Women’s Day halor ka Theme “For All Women and Girls: Rights, Equality, Empowerment” hynnin ka sngi (7/3/25) ha District Library Auditorium, Mynthong, Jowai. Kane ka jingïalang ka la rakhe ruh ïa ka jingdap 10 snem jong ka prokram sorkar kmie kaba la tip kum ka Beti Bachao Beti Padhao (BBBP) kaba pynpaw ïa ka jingpyrshang kaba shisnem ban kyntiew bad pynkupbor ïa ki khynnah kynthei lyngba ka jingnang jingstad bad ka jingïaryngkat shynrang bad kynthei.
Ha kane ka sngi la iadon lang ka kong D V Lyngdoh, MCS, Additional Deputy Commissioner, West Jaintia Hills, u Additional Superintendent of Police u Ishaan Gupta, IPS, ka Resource person ka kong I. Warjri Assistant Director ka Good Governance Cell ka Meghalaya Administrative Training Institute, Shillong bad ka kong Y. Najiar, u ophisar ka District Social Welfare cum u District Nodal Officer ka DHEW, Jowai.
Haba kren ha kane ka sngi ka kong D V Lyngdoh ka la ban jur ba ka jingnang jingstad ka dei u shabi ban pynkupbor ia ki kynthei, ka pynkhreh ia ki ban iada ialade na ka jingshah lehbein bad ha ka hok, hynrei ka la kdew ba ka jingnang jingstad kaba shisha kam dei tang ban ioh ia ki kyrdan pule hynrei ka kynthup ruh ia ka jingtei ia ki akor kiba khlain, ka jingburom bad ka jinglong jingman.
Ka la kyntu ruh ia ki kmie ki kpa ba kin pynthikna ba ki khun kin pyndep ia ka jingpule jong ki, namar ka jingsangeh skul ka lah ban ktah jur ia ka lawei jong ki. Da kaba pynksan ba ka jingnang jingstad ka long kaba donkam ban jop ia ki jingeh, ban kyntiew ia ka jingim bad ban pynroi ia ka jingburom ha ka imlang sahlang.
U Additional Superintendent of Police u Ishaan Gupta u la pynpaw ba la kha ia u ha ka jylla kaba ka jingsynshar ka iapher na ka jylla Meghalaya. U la iaroh ia ka jingkhlain bad jingkut jingmut jong ki kynthei hangne, da kaba kubur ia ka jingnoh synniang jong ki ha ki kam bapher bapher, la ka long ha ki kam sorkar ne ha ka sain pyrthei. U la iaroh ruh ia ka jingiashim bynta shitrhem jong ki nongshong shnong ha ka roi ka par ha ka imlang sahlang, da kaba pynpaw ba kum kane ka jingiatylli kam niar ban iohi shawei pat.
Shuh shuh, u pynshlur ïa ki paidbah ban kyrshan iwei ïa iwei pat ha ki por ba eh bad ban ïaid shakhmat ha kano kano ka por ba ki jingeh ki mih.
Ka kong I Warjri ka la ai jingshai halor ki mat ba kongsan kiba iadei bad ka jingshngain jong ki kynthei, ka jingiada bad ki skhim ai jingmyntoi jong ka sorkar. Ka la ban jur halor ka jingdonkam jong ka One Stop Centre (OSC) kaba long kum ka jaka ai jingkyrshan mardor ïa ki kynthei kiba ïakynduh ïa ki jingshah thombor. Ka OSC ka ai ia ki jingshakri kiba donkam kynthup ia ka jingiarap ha ka liang ka koit ka khiah, ka jingiarap ha ka liang ka aiñ, ka jingai jingmut ha ka liang ka jingmut jingpyrkhat bad ka jaka sah ba shipor. Ka la kren halor ki jingiada kiba don hapoh ki aiñ kum ka aiñ iada ia ki kynthei na ka jingshah lehbeiñ ha iing ha sem, da kaba kyntu ia ki kynthei ban wad ia ka hok bad jingkyrshan khlem jingtieng.
Ka kong Warjri ka la ai jingmut ruh shaphang ki skhim sorkar bapher bapher jong ka sorkar pdeng bad ki skhim jong ka sorkar jylla, kiba thmu ban pynkupbor ia ki kynthei ha ka imlang sahlang, ka ioh ka kot bad ka jingiada katkum ka aiñ.
Kum shibynta jong kane ka jingrakhe la pynlong ruh ïa ka jingiasoi kyrteng ha kaba ki nongïashim bynta kynthup ïa u Additional Superintendent of Police Ishaan Gupta, IPS, ka Additional Deputy Commissioner ka kong D V Lyngdoh, MCS, ki heh sorkar, ki samla pule, ki ophisar bad ki nongtrei jong ka District Social Welfare Office ki la soi kyrteng kum ka jingkular ban kyrshan ïa ka jingpynkupbor ïa ki kynthei bad ka jingïaryngkat dor.
Nalor kata, la shim ruh ïa ka jingkular (pledge) na ka bynta ka hok jong ki kynthei da ki nongwan, ba la ïalam da ka kong L Ksoo, kaba dei ka Centre Manager cum Protection Officer jong ka One Stop Centre.
